男星班傑煮女兒胎盤為老婆補身 分享口感及煮法嚇呆網民

楊千嬅主演電影《三更2之餃子》以高價向媚姨買胎兒餃子以補身回春，為保容顏而不斷食嬰胎餃子，現實中亦有食胎盤「補身」，近日台灣男星班傑與太太迎來女兒Stella出世，班傑喺IG分享一條親自煮胎盤畀太太補身嘅影片，令一班網民相當震驚。 

班傑聽講胎盤係珍貴中藥材，食胎盤可以補鐵與美顏，令身體復原更快，所以佢喺太太產後請工作人員將胎盤及臍帶包好，之後佢拎返屋企親自料理，先見血淋淋嘅胎盤清洗乾淨後，加入洋蔥、紅椒、胡椒粉等快炒，兩公婆表示「第一次吃人肉」，第一口係有啲怕，感覺就好似外國人食豬紅咁，食落跟鴨血口感好似，而佢老婆稱冇腥味，喜歡另外一塊「有帶膜」嘅胎盤，食落比較好食，口感有些脆，班傑則形容係「像是腳筋跟豬肝綜合體」 。

該血腥影片喺網上流傳，不少網民表示恐怖，雖然民間認為胎盤即「紫河車」聲稱有滋補養顏「神奇功效」，繼2015年將紫河車（即人類胎盤）從藥典品種中刪除，2020版《中國藥典》亦將含有紫河車成份嘅「益血生膠囊」從藥劑中刪走，宣告人類胎盤無論係原料及產品，徹底從中國藥典中消失!