少女風《Little Magic》成四台冠軍 Gigi綵排個唱心情如虎添翼

周末就會舉行兩場首次個人演唱會嘅 Gigi炎明熹 ，早前推出嘅充滿少女風輕快作品《Little Magic》，正式成為中文歌曲龍虎榜、新城勁爆流行榜、勁歌金榜同商台903專業推介冠軍歌，成為佢出道兩年以來嘅首支四台冠軍作品，認真可喜可賀。

Gigi嘅《Little Magic》成為佢首支四台冠軍歌
 
正密集為個唱綵排嘅佢，今日追月收到好消息，令佢心情更加興奮：「當日收到《Little Magic》呢首歌，有少少擔心歌迷會唔會接納，因為隻歌好少女味，節奏好輕快，同我本身個形象唔係太夾，哈哈！加上我換咗另一種唱腔，都驚大家唔認得我把聲。」

不過佢對會唔會再以類似曲風推出新歌就有啲保留喎
 
對首次成為四台冠軍歌得主，Gigi就話要歸功於一班幕後團隊喇：「要多謝作曲嘅J.Arie、填詞嘅雷暐樂、監製陳考威、編曲Sea Travel，當然仲要多謝公司上上下下落力為《Little Magic》宣傳嘅所有同事。」

Gigi又話今次好成績要歸功於幕後團隊嘅幫忙喇
 
今次少女風作品得到廣大歌迷受落，不過Gig就對再唱類似作品有所保留喇：「我仲係新人，應該嘗試更多唔同嘅曲風，慢慢摸索自己日後嘅歌路，所以唔同嘅曲風，唔同嘅音樂人，我都想嘗試、同埋合作，正如嚟緊我嘅演唱會，特別搵咗兩位我好欣賞嘅前輩，做我嘅演唱會嘉賓，兩位都係第一次同台合作，我自己都好緊張，但我相信大家會有驚喜，希望歌迷會喜歡我呢個安排。」