對戰大魔王安雅希最有睇頭 陳俞霏唱《失戀無罪》自爆失婚

《中年好聲音2》12月10號播出一集係第六部曲《廿一強全新賽制動感/ 情感PK賽》，而新回合亦有新賽制，21強選手將以動感或情感歌曲進行PK賽，佢哋會按照上回合獲得嘅成績，由高至低輪住揀選「動感/情感」歌曲同出場次序。

本回合會分成上、下半場進行，頭五組會率先進行上半場比賽、尾五組進行下半場比賽，呢個回合又設有晉級區同危險區，完成PK賽後成績較高一位直接晉級，較低者則跌落危險區，上半場將喺危險區淘汰一人，下半場再喺危險區淘汰一人，本回合總共會淘汰三人。

今集對戰組合: 
動感歌曲組別
《I Hate Myself For Loving You》麥素華VS《失憶周末》周碧嘉
《瀟灑走一回》袁思樂 VS《餓狼傳說》曾蜜詩
《Monica》古淖文VS《結他》朱博文

情感歌曲組別
《時間都去哪兒了》林若盈VS《Kiss Goodbye》譚輝智
《 心如刀割》安雅希 VS《失戀無罪》陳俞霏

呢集以安雅希對戰陳俞霏最有睇頭，陳俞霏透露演唱《失戀無罪》嘅原因：「前嗰排經歷咗好多事，導致婚姻失敗等等一系列嘅事，覺得揀呢首《失戀無罪》幾好，其實就算一個人獨身都可以好快樂， 希望不負呢個舞台同埋自己。」

陳俞霏比賽時突然自爆早前失婚

而今集亦有感人故事，林若盈獻唱《時間都去哪兒了》送比患有抑鬱症嘅媽媽，佢眼濕濕咁話： 「作為抑鬱患者嘅屋企人，其實有好大壓力，時間過得好快，當我回頭睇我媽咪嘅時候，其實發現佢老咗，想同大家講，就算同屋企人有誤會，其實係可以好好溝通一下。」

林若盈呢日就為患抑鬱症嘅媽媽獻唱

獻唱《結他》嘅朱博文重提自己崎嶇不平嘅追夢故事，博文預科畢業後考入香港演藝學院，同時參加一個歌唱比賽，但原來學院唔容許學生喺有合約的情況下讀書。博文決定放棄學業選擇歌唱比賽，可皆最終鍛羽，人生亦跌入谷底。多年後再重拾音樂夢係為咗天上嘅姐姐，佢話︰「本身無再諗過唱歌，但今年3月頭我姐姐離開咗，今次參加呢個節目，我行返出嚟做呢件事，係希望喺天上嘅姐姐睇到會為我而驕傲。」

朱博文亦將過往高低坦露人前