Benz雄嫁女丨林子善見證馬國明娶妻後現身 感性稱唐詩詠結婚必喊到跪低

馬國明與湯洛雯早前喺泰國蘇梅島低調舉行婚禮，一班圈中好友非常口密，即使回港受訪亦守口如瓶，等一對新人喺社交平台公佈婚訊後，一眾賓客即上載大量合照，分享見證馬國明與湯洛雯幸福浪漫時刻，而鐵馬家族成員之一嘅林子善見馬明成家，更多次爆喊替好兄弟高興。

子善日前見證好兄弟娶妻之後，今晚再現身Benz雄女兒婚禮，當年子善拍TVB劇《奸人堅》，嗌黃子華做「師父」，子華就叫子善嗌Benz雄係「師公」，子善與Benz雄多年老友鬼鬼，當然要出席！

講起馬明婚事終於唔使守秘密，子善受訪時稱鐵馬家族成員都好口密，希望記者朋友見諒，子善更叫「二哥」馬國明同「二嫂」湯洛雯手下留情唔好上載佢太多喊相，子善更指若果「阿妹」唐詩詠結婚，一定喊到跪低！