炎明熹演唱會尾場三度落淚 任賢齊驚喜現身大讚Gigi係未來嘅天后

一連三場《炎明熹Gi-FORCE演唱會2024》噚晚（14日）尾場圓滿落幕，去年10月因颱風關係而取消補場場次。是晚獲陳煒與丈夫陳國強、姜皓文、陳山聰與囝囝陳霆軒、李幸倪到場支持。來到第三場，Gigi依然狀態大勇，又唱又跳表現落力。

《炎明熹Gi-FORCE演唱會2024》噚晚尾場圓滿落幕。

Gigi呢晚後空翻動作發生咗一個小插曲，正當Gigi完成空翻動作落地，可能用力太猛，最終Gigi被衛衣嘅帽「兜頭笠」，完全遮擋視線，只見Gigi先露出既可愛又尷尬嘅笑容，之後秒速整理衣服繼續又跳又唱，緩解呢個蝦碌場面。 除咗唱自己嘅歌，當然少不了佢嘅「自選歌單」Gigi笑指呢張歌單由逾200首歌精心挑選。

Gigi第三場依然狀態大勇，又唱又跳表現落力。

林智樂（Felix）過去三場演唱會擔任Gigi音樂團隊成員，來到尾場按捺不住，喺台上公開力讚Gigi，除咗唱功了得，抗壓能力亦強悍：「雖然有好多人讚佢，但有時都有啲好尖銳嘅留言，但佢都冇嘢，更重要係由我啱啱識佢到而家，佢個初心都冇變，對每個人都好好。有時記者朋友問我會唔會羨慕Gigi嘅事業，我覺得唔係羨唔羨慕，而係佢真係好值得擁有！」身旁嘅Gigi即感動表示好少聽對方如此認真說話，感謝對方為自己唱足三晚，接着Gigi獻唱《星語心願》。 

Gigi被衛衣嘅帽「兜頭笠」，完全遮擋視線。

接着Gigi獻唱《星語心願》，隨後唱出《對面的女孩看過來》，任賢齊（小齊）此時突然現身合唱，讓樂迷大為驚喜，全場大合唱為演唱會掀起高潮。小齊謙虛感謝Gigi畀機會自己做嘉賓：「 因為我成間公司所有同事都好鍾意Gigi。噚日我喺新加坡做完演唱會返嚟，我啲夥計全部唔見晒，個個都嚟睇你，仲要一張飛都冇留畀我！同事們，聽住，聽日返工唔使咁早，好好享受今晚Gigi嘅演唱會。」小齊笑指Gigi與自己女兒同一年出世，小齊笑指：「人多嘅時候叫我小齊哥，唔好叫Uncle呀。」 

任賢齊此時突然現身合唱，讓樂迷大為驚喜。

之後Gigi送上繡有小齊名字嘅水樽：「我知你5月份開巡迴演唱會，所以我揀咗呢個，識自己煲水嘅水樽，呢個可以直接煲水非常方便，我都繡咗你個名喺度。」小齊自嘲年輕嘅時候仍會飲凍飲：「漸漸就用咗暖水壺啦，好多謝你。我真係成間公司都講，佢係未來嘅天后，希望大家都畀多啲機會Gigi。」最後小齊再為樂迷送上《我是一隻魚》，全場跟住和唱。 

小齊謙虛感謝Gigi畀機會自己做嘉賓。

開騷前大批歌迷要求Gigi唱出MV喺YouTube短短4日破百萬點擊嘅新歌《還有一艘救生艙》，收到大家訴求後，Gigi特意於補場上送予歌迷，卻一時感觸唱到喊，幾乎大半首歌要台下歌迷代唱，Gigi表示：「今日係最後一場演唱會，即係今日係最後嘅一次，然後大家要遠離我嘅感覺。點解今晚先揀呢首歌嚟唱？因為我想送呢首歌畀補場嘅大家，但係我真係冇用，成首都唱唔到，要大家幫我，我下次會唱好佢㗎。」台下再次大叫「加油」，為哭成淚人嘅Gigi打氣。 Encore部份，Gigi特別為尾場樂迷獻唱《你是你本身的傳奇》，坦言台下每位歌迷都係一個傳奇，一起成就咗佢嘅歌手夢，Gigi再一次落淚，對於呢個人生第一個演唱會舞台、仲有台下觀眾，充滿不捨之情；唱到演唱會最後一首歌《Only For Me》，Gigi叫大家高舉手機燈和唱，望向呢遍燈海，Gigi淚水再一次滑落。

Gigi喺尾場淚水再一次滑落。陳煒、陳山聰、姜皓文到場支持。