星光路上｜鄭則士潛伏5年買餸變廚神 新劇吸拍檔熱血精華併發火花

入行近半世紀嘅 鄭則士 最近喺《神耆小子》扮演富甲一方但係同家人關係麻麻嘅 錢大海 ，經驗豐富嘅Kent哥接受《星光路上》 潘盈慧 嘅專訪，仲提到呢個演員夢其實年紀小小就已經萌芽，仲笑指自己當年只係因為貪慕虛榮而有呢個諗法。

後來實際入行之後，先了解演員並非其他工作，收入唔見得非常穩定，仲比當時自己嘅首飾技工嘅正職少一大截，但係年青人總係抱住一試嘅心態，於是當時佢就向媽媽許下承諾，比自己一張合約嘅時間。

近5年Kent哥自評「休而不息」，每日陪住太太飲咖啡買餸，過唔少人稱羨嘅生活，仲因而廚藝突飛猛進，每日自在諗定今晚食乜餸。天生愛演戲，唔演出就如蟻咬坐唔定，Kent哥笑言一收到邀請，就搖頭擺尾直接應承，但係事後先開始擔心。

擔心退步、又擔心跟唔上節奏，Kent哥思前想後，決定向最年青嘅演員埋手，佢口中嘅殭屍理論，就選定要向Archie 冼靖峰 吸血，實行以24歲嘅熱血，加埋 蕭正楠 樊亦敏 等拍檔嘅火花，令自己重回狀態。

要同首次拍劇嘅Archie再多合作，Kent哥大讚呢位年青人好學、謙卑又有天份，同其他經驗演員合作亦完全融入其中，亦間接令自己亦爆出更好表現。

72歲嘅Kent哥一貫精靈可愛，佢仲話自己要做到至死方休，認為係對自己能力同價值嘅認可，仲公開呼籲大家有合適角色可以隨時同自己聯絡。自己享受加上家人支持，而同住嘅兒媳相處樂融融，身處上海嘅乖女同女婿亦日日聯絡，一家和睦就係佢心中最高嘅目標。