萬眾同心公益金丨譚輝智父子檔演出 關楓馨否認所有緋聞稱工作為先

一年一度嘅慈善騷「萬眾同心公益金」將會喺6月1號晚舉行，呢日一眾大會司儀及演出嘉賓現身記者會並宣布表演內容，其中《中年好聲音2》嘅人氣王 譚輝智 就會破天荒同好唱得嘅爸爸父子檔獻聲，為慈善出力；而 羅啟豪Ramon 亦會同做過歌手嘅媽咪一齊上陣。呢次四位一齊合作，Ramon同輝智都覺得好新鮮，輝智仲透露譚爸爸同羅媽媽會喺節目中二人合唱，佢話自己就好期待今次演出喇。

而中聲1唱將 李佳 ，早前為前輩 葉振棠 合作嘅歌曲，亦會喺呢個騷度首次獻唱。講起棠哥嘅紅館告別騷，佳佳就話自己好榮幸可以參與演出，而棠哥就表示演唱會籌備得七七八八，原本佢打算邀請所有曾經一齊錄過碟嘅歌手嚟做嘉賓，但因為好多歌手都有工作在身嚟唔到，棠哥又話令佢最驚喜嘅係，雷安娜專程喺加拿大飛返嚟香港幫佢做嘉賓，另外嘉賓仲會有張德嫻。
呢排緋聞不絕嘅 關楓馨（花B） ，早前傳出同大隻模特兒 徐灝晴Hugo 拍拖後，日前又指佢被3型男力追， 孔德賢Danny 同 焦浩軒 都成為新緋聞對象，呢日花B就話係一個美麗嘅誤會，仲笑言Danny被嚇到呢日都唔敢現身，又話如果再咁樣落去自己會冇晒啲朋友。問到同幾位男士係咪零發展空間？花B就話 Danny 同 焦仔 一直都係同事，而Hugo就係朋友，係一大班朋友一齊去玩時識嘅，花B坦言而家冇戀情，又話因為要努力工作所以唔會咁快拍拖呀。

中聲2嘅唱將 古淖文 黃劍文 同 顏米羔 就表示準備咗百老匯式演出，到時會帶大家返到去1968年嘅夜上海年代，而 安雅希 就 表示好開心可以同 湯寶如 王馨平 林二汶 一齊前輩一齊演出。