萬眾同心公益金｜ FC啟豪與父母合唱成焦點 四大視帝合唱馬明成舞蹈擔當

籌款節目《萬眾同心公益金》星期六晚圓滿舉行，大班藝員歌手為募集善款傾力演出，好似兩季《中年好聲音》嘅成員 羅啟豪 譚輝智 就分別同媽媽、爸爸四人別開生面台上合唱喇，而FC頭號歌迷 拉姑 亦有現身捧場仲捐出50萬善款，至於FC夫人亦捐出10萬支持老爺同老公嘅演出呀。

事後FC同Ramon都話，呢次演出機會非常難得，FC仲話私下都未曾同一樣鍾意唱歌嘅Daddy合唱過，所以認為係非常深刻嘅演出，仲爆爸爸事前話好緊張呀。Ramon又指呢次合唱好似重返當日比賽時合作一樣，仲話同FC有好多相似之處呀。

《中年好聲音》兩季孕育出唔少新歌手，呢晚除咗FC同Ramon之外，有份參與嘅 周吉佩 顏米羔 同 黃劍文，仲被同場出現嘅總經理志偉哥稱為「新五虎」，仲解釋三個字嘅真正含意呀。

吉吉呢日就預告，之後會同中聲2嘅成員會有唔少合作機會，兩屆成員會有不同種類形式嘅聯乘演出。仲話兩屆成員嘅氛圍其實大有不同，中1比教文靜有禮，而中2就非常活潑喇。

女子組似乎一樣有兩屆唔同睇法，好似身形極高嘅 安雅希 就被 李佳 投訴出騷著埋高踭鞋高上加高，幾乎笑死 支嚳儀 呀，同 龍婷 合唱嘅安雅希，就話呢次合作好玩又難得喇。

呢晚仲有四大視帝 陳豪 馬國明 譚俊彥 同 陳展鵬 為慈善台上合唱，馬明仲被突然推舉成為舞蹈擔當喎。殿堂級歌手 葉振棠 呢日同 李佳 合唱，即將再登紅館演出嘅佢，就當成係個唱嘅熱身喇。 

年青嘅《聲夢》成員，呢日都為善款傾力演出，其中完成DSE考試嘅 詹天文 同 鍾柔美 就心情放鬆唔少，Yumi仲好開心咁分享早前嘅韓國見識之旅，仲唔覺意使多咗錢。早前接受植髮嘅Windy，呢日就分享其中過程同事後感受喇。