集合三大視帝 陳豪 馬國明 黃宗澤,以及 吳啟華 蔡潔 羅子溢 洪永城 劉穎鏇 陳星妤 等參與演出嘅新劇《執法者們》舉行煞科慶功宴,今次拍攝過程充滿挑戰,劇組特登去到山東一個荒廢嘅鑽油台取景,不過阿Mo同馬明就冇份去,馬明就話自己好恨去山東,去唔成令佢好傷心,而阿Mo就搞笑話,雖然冇份去,但精神就與大家同在。
而親身去到當地拍攝嘅Bosco就以死過翻生來形容拍攝感受,因為拍攝地點遠,冇辦法日日返酒店,索性就住喺片場。至於拍檔蔡潔就大讚Bosco非常照顧劇組,經常準備鮑魚幫大家加餸。Bosco同蔡潔喺劇中會有感情線,因為二人私下好老友,所以拍起上來默契十足,仲經常爆肚,蔡潔話自己加咗好多台詞,包括不斷問Bosco自己靚唔靚,搞到Bosco非常無奈。
劉穎鏇今次首次同阿Mo合作,佢話開心之餘都喺呢位視帝身上學到好多嘢,Tiffany話自己係第一次喺劇中著上律師袍,見到阿Mo講法律專業用語非常熟練,表現專業,果然好有視帝風範。
子溢喺熱播劇《家族榮耀之繼承者》中同 梁洛妍 有唔少愛情動作戲,呢日Tony一見到子溢,即刻七情上面扮嬲交足戲,Tony仲諗到報復嘅方法,就係話要搵子溢嘅太太楊茜堯傾偈。
至於有一段時間冇返香港拍劇嘅吳啟華,今次可以同咁多好戲之人合作,佢都話好過癮,仲嫌唔夠喉,希望可以再開續集一路拍落去。
![東張+ | myTV SUPER 24小時即時新聞 本地、國際時事熱話 東張+ | myTV SUPER 24小時即時新聞 本地、國際時事熱話](/tc/scoopplus/img/logo.png)
登入後即可查看我的收藏
登入後即可查看瀏覽記錄
![myTV SUPER myTV SUPER](/tc/scoopplus/img/img__header_superlogo.png)
![myTV SUPER myTV SUPER](/tc/scoopplus/img/icon__header_gosuper.png)