廖駿雄設靈丨杜琪峯 湯鎮業紛紛送別故友 囝囝家爵含淚憶亡父報夢

憑TVB經典劇《天師執位》中飾演大粒癦而令觀眾印象深刻嘅資深演員廖駿雄，喺上月18號不敵病魔而離世，終年64歲。廖駿雄囝囝家爵同囡囡寶兒今日（14號）喺大圍為亡父設靈，靈堂佈置簡潔，橫匾寫上「德範長存」，喪禮採用佛教儀式進行。廖駿雄生前喺娛樂圈人緣甚廣，不少圈中人如周潤發、杜琪峯夫婦、韋家輝、鄭少秋、任達華、黃日華、苗僑偉夫婦、姜皓文、翁靜晶、滕麗名及許秋怡等送上花圈致意。另外，杜琪峯、湯鎮業、黃日華、方中信夫婦、劉江、謝寧、譚玉瑛蕭正楠夫婦、魯振順同林韋辰到嚟致祭。

憶述亡父生前點滴，家爵盡現不捨之情，當初亦冇諗過爸爸咁快離開，所以冇問到生前遺願。佢話同爸爸都係大男人，好少講心底話，而爸爸畀佢嘅教導就係自食其力。家爵又講到爸爸離開後曾經報夢，佢哽咽講到夢到爸爸幫媽咪拉被，但因為擔心媽咪會傷心，所以唔敢同佢講。

跟廖駿雄同為第八期藝員訓練班嘅湯鎮業同魯振順，一齊到嚟送別故友，湯鎮業話當初廖駿雄畀佢印象係豪爽，非常關心朋友同學。佢哋為咗方便返訓練班，一齊夾錢喺廣播道租單位住，友情係班中最好。魯振順話自己同廖駿雄性格雖然兩極化，但遇到問題時對方會義不容辭幫忙，魯振順喊住話自己有段時間經歷人生低潮，對方二話不說借咗間屋畀佢住。