陶大宇憶曾抗拒「師奶殺手」綽號 拍劇試過4個月每日瞓得2粒鐘：而家拍肯定入院

元祖級「師奶殺手」陶大宇噚晚接受伍仲衡同周國豐主持嘅網上節目《週五有周伍》，暢談入行拍攝嘅開心點滴，爆自己喺拍戲試過愛上對手，又講吓當年喺清水灣電視城嘅休息室曾被「鬼壓床」；大宇喺節目唱完《倒轉地球》就叫《中聲》評判伍仲衡同周國豐評分，伍仲衡笑指好難入決賽，大宇聞言即大笑。

陶大宇噚晚接受伍仲衡同周國豐主持嘅網上節目《週五有周伍》，暢談入行拍攝嘅開心點滴。

大宇讀第12期無綫電視藝員訓練班入行，呢屆學生係最後一屆要讀1年時間訓練班，同屆同學有劉青雲、吳啟華、陶大宇、吳君如及劉嘉玲等，大宇直言當年入行係想做明星，起初掛住玩，自覺演技未算好，直至接《大時代》呢套劇後先開竅，大宇飾演殘暴不仁嘅「丁益蟹」，記得有次佢同「丁利蟹」郭政鴻一齊收工，見郭政鴻被的士拒載，第一時間衝去鬧司機，期間意識到抽離唔到角色，大宇就提自己唔可以咁樣。

大宇飾演殘暴不仁嘅「丁益蟹」，曾抽離唔到角色，大宇就提自己唔可以咁樣。

大宇當年拍《刑事偵緝檔案》及《壹號皇庭》系列大受歡迎，佢最記得《刑事偵緝檔案II 》當時同友台打對台，臨時加10集1個月內起貨，大宇當年完全冇得返屋企瞓，笑指拍嗰陣仲後生，而家拍就肯定要入院，大宇回想拍劇試過四個月每日瞓得2粒鐘，直言復出拍劇要先被劇本感動。

講到同「車匙」郭可盈合作最多，大宇笑言見佢仲多過見屋企人，嗰陣一年起碼見半年時間。

大宇之前出席《刑事偵緝檔案》飯局，個個老友鬼鬼，講番以前拍劇點滴，令大宇非常開心，講到同「車匙」郭可盈合作最多，大宇笑言見佢仲多過見屋企人，嗰陣一年起碼見半年時間，二人更忙到連食飯瞓覺時間都冇，拍到好似「行屍走肉」咁，一cut就想搵位坐吓。

大宇之前出席《刑事偵緝檔案》飯局，個個老友鬼鬼。

大宇覺得喺行內最夾係歐陽震華同宣萱，拍《壹號皇庭》亦比較好玩，跟歐陽震華對戲都知道大家想做啲嘢，而宣萱又搞笑好玩；貴為元祖級「師奶殺手」嘅大宇，坦言一開始聽呢個名覺得哽耳，後來慢慢接受，知道係一個讚美嘅綽號！

大宇覺得喺行內最夾係歐陽震華同宣萱，拍《壹號皇庭》亦比較好玩。

大宇認拍戲時有鍾意對手，連返屋企都會掛住佢，但自己並冇表白，大宇話演戲係會感覺到對方係咪有意思；以前小生花旦拍戲，大家知道係要攬要抱，事前冇刻意去講，不過佢面對新人，埋位前就要講清楚盡量小心啲，譬如親熱戲就更加要溝通一下。

《壹號皇庭》原班人馬曾相約食飯，難得同劇中友人重聚，大宇回想亦相當興奮。

此外，大宇最難忘喺清水灣電視城嘅休息室曾被「鬼壓床」，當時入去見到前輩鮑方瞓喺隔籬休息，大宇瞓咗一陣，睜大眼真係完全郁唔到，等咗一陣先起到身，呢次係大宇入行第一次遇到怪事。