王敏奕陪細佬放暑假 期待年底開拍《新聞女王2》

Venus王敏奕 早前同 周奕瑋 赴關西拍攝嘅飲食節目《感動味蕾》，節目聽晚(7月1號)就會首播。而忙完節目宣傳後，Venus終於可以迎接佢久違嘅暑假喇。呢日佢現身一個慈善活動時透露，話自己已經四年冇放過暑假，仲話最開心可以同16歲嘅細佬一齊享受假期。

其實Venus啱啱先去英國陪喺當地留學嘅細佬考試，可以話係廿四孝好家姐，佢仲話去年細佬返港放假，佢就咁啱飛咗去馬來西亞拍《家族榮耀之繼承者》，遺憾錯過兩姊弟相聚時光。

講起呢個得來不易嘅假期，Venus反而唔想計劃太多，陪屋企人之餘，佢仲希望去欣賞好姊妹糖妹嘅演出：「平時無假期嘅時候，好難計劃十日嘅私人行程，依家終於可以約到去月底見朋友，真係好開心。」

Venus有份主演嘅《新聞女王》將會開拍續集同電影版，工作上佢就話暫時等待《新聞女王2》喺年尾開拍，同時手上亦有另一部劇集，被問有否八卦電影版同續集嘅內容，Venus就完全尊重幕後團隊嘅創作，知道劇本喺創作過程中會不斷變化，角色比重都會跟劇情走向而調整，佢都好希望佢演嘅角色劉艷可以留低。