福祿壽訓練學院｜陶大衛成《福祿壽訓練學院一級榮譽生》關嘉敏扮FC形神俱似

經過多輪比賽、參加者傾盡全力扮鬼扮馬演出之後，由 阮兆祥 王祖藍 同 李思捷 三位Professor帶領嘅各位成員，經過11集對戰，最後十強包括 彭建豪 趙頌宜 周百恩 林樂熙 陶大衛 黃建東 陳柏曦 吳兆麟 關嘉敏 同 葉泓聲 ，呢晚齊集《福祿壽訓練學院終極對決》正式決出最後皇者。

呢晚兩小時直播嘅終極對決中，先由「福祿壽」同伯樂 汪明荃一齊以旗袍造型現身，一齊表演歌曲《舞女》，之後阿姐仲指《荃加福祿壽》已經係14年前嘅節目，自己見證三子嘅成長，亦都非常想報名學扮嘢，之後仲獲頒發「福祿壽訓練學院榮譽博士」。

汪阿姐以特別嘉賓身份現身仲獲頒福祿壽訓練學院榮譽博士

呢晚負責評審嘅包括錢嘉樂、曾志偉同江美儀，而十強參賽者演出後分別會獲評審同觀眾評分相加而得出總成績。

整晚比賽先由曾先後扮過郭富城同Michael Jackson嘅彭建豪扮演杜德偉嘅《脫掉》，期間先後兩次被舞蹈員扯掉長褲露出孖煙囪同有福字嘅內褲，非常搞笑。

彭建豪嘅《脫掉》不惜除剩底褲

緊接由陳柏曦演出「Wrong傑的悲傷世界」，佢先用哭腔唱出《獎門人》主題曲，期間唱到「俾獎金 數百萬當係碎銀」時，竟同步向天大拋溪錢。之後又再以哭腔唱兒童節目主題曲《HandHands Up》，最後再「醒覺」以譚詠麟聲線唱出《幾分傷心幾分痴》。

陳柏曦大灑溪錢笑到肚痛

一度於出局邊緣嘅趙頌宜之後上場，演出「年三十晚的夏胃BB」，先以傳統服裝獻唱《禪院鐘聲》，再於台上快速更衣變成短裙仔熱舞繼續唱，面上嘅化妝真係同夏蕙姨有幾分神似。

趙頌宜醜化自己扮演「夏胃BB」

之後多次表演都大受好評嘅 陶大衛 就以過往其他學員嘅演出之大成，更以三星期時間苦練鋼管舞動作，成功獲得評審比出高分，佢表達感受時 阮兆祥 更感動到喊。

陶大衛選擇扮演一眾學院成員過往表演連陳懿德嘅造型都被佢神複製

而《中年好聲音2》成為街頭巷尾嘅話題， 關嘉敏就決定扮演人氣王譚輝智，一出場就吸引全場掌聲，令人難以置信嘅相似程度加上一樣甩漏嘅舞步，仲有舞蹈員戴上狄波拉面具於旁邊伴舞，令人忍俊不禁。

關嘉敏則神還原中聲2人氣王譚輝智連拉姑亦都有出現一齊表演

其後到葉泓聲接力上陣，佢以導師李思捷嘅《思家大戰》模式現身，先後以重新改詞嘅《狂野之城》同《倒轉地球》演出，加上佢耍家嘅強勁舞步，同樣獲得評審不俗分數。

葉泓聲就扮返導師思捷嘅拿手好戲

周百恩就選擇急速扮演多位前輩歌手嘅經典演出，先後扮演鍾鎮濤、羅文、鄭少秋、黃霑仲有米雪嘅經典作品。

周百恩扮演多位前輩歌手演出

黃建東選擇扮演早前《Barbie》真人版演出「完美的Ken」，先後彈奏鋼琴，又以合成技術同女裝打扮嘅自己一齊跳踢躂舞，不過曾志偉就認為一般觀眾未太熟悉表演內容，最後東東分數一般。

黃建東以阿Ken造型出賽彈琴跳舞

之後出場嘅吳兆麟再次以大騷腹肌，「穿Heels的男人」以熱褲高踭鞋上陣，大跳Britney Spears名作《Baby One More Time》，除咗江美儀大讚之外，各位導師同評審亦都讚頌有嘉。

吳兆麟嘅修長雙腿完全唔輸比女舞蹈員加上強勁腹肌大受江美儀青睞

壓軸出場嘅林樂熙則以一貫強勁嘅扮聲技巧，喺「聲級！大戰一觸即發！」一人扮演鳥聲、警報、怪獸腳步聲、機械人攻擊等唔同聲音。

林樂熙亦再次展現佢嘅扮聲功力

經過一輪演出，陶大衛同吳兆麟因為同樣得47.3分，而一齊獲得「專業評審大獎」。

陶大衛同吳兆麟嘅演出獲得同分，同時獲專業評審大獎

至於兩位扮工室助理陳懿德同郭珮文，經過每一集嘅奇特扮相出場之後，呢集就加入扮嘢行列，扮演「穿s」演繹Twins嘅經典歌《明愛暗戀補習社》，仲原版重現經典側手翻。

扮工室助理陳懿德同郭珮文亦演出《明愛暗戀補習社》兩位女主持青春可人，獲唔少掌聲

最後經過4個多月比賽之後，加上呢晚終極對決嘅專業評分加上觀眾投票，結果 陶大衛 贏得「福祿壽訓練學院一級榮譽生」 。而志偉亦率先表示眾學員將會喺台慶再同觀眾見面，又希望他日佢哋會有自己嘅節目，繼續發光發亮。

陶大衛加上觀眾投票分數，最後得一級榮譽生，成為終極扮嘢之王
福祿壽三位亦接受一眾學員嘅《告別校園時》感謝