劉雅瑟拍爆破戲弄傷眼 霆鋒大讚拍檔專業又拚搏

憑電影《智齒》榮登金像獎影后嘅 劉雅瑟 ，首次喺《海關戰線》中變身動作女星賣命演出，喺拍攝一場同 謝霆鋒 喺戰火中嘅逃命爆破戲時，不慎被化學品濺中眼部受傷，喺雙眼漆黑一片下仍強忍痛楚，繼續隨霆鋒喺瓦礫中奔跑完成呢幕驚險鏡頭。

劉雅瑟同謝霆鋒拍攝《海關戰線》一場爆破戲發生小意外

駐劇組醫護同工作人員，事後第一時間衝上前為佢進行治理，過程中花咗十多分鐘，先可以用眼藥水將化學品沖走。之後雅瑟亦到醫院治療眼傷，翌日亦有覆診，醫生指佢眼球擦傷留有四點傷痕，視覺上亦睇到四點陰影，好彩醫生向佢大派定心丸，表示會逐漸康復並消退。

雅瑟被沙塵入眼需即時接受治理

休息咗一日嘅雅瑟已急不及待復工， 作為動作指導嘅霆鋒，都大讚呢位「初哥」專業又拚搏，絕對係膽色過人，仲話好似見到當年初出道時嘅自己！只係休息一天，雅瑟再次投入拍攝，態度可嘉。

事後休息一日之後，佢已經重投拍攝喇