Sammi邀林家謙任嘉賓拖手合唱 半夜唔瞓重睇演出仔細檢討

鄭秀文 一連13場演唱會等足一年終於重新啟動，除咗十多個造型貫徹佢多年來嘅唔同型格作風之外，最令觀眾同外界驚喜嘅，當然係經歷風波後Sammi同老公 許志安 再次同台，雖然評論評價不一，不過大部份人都指希望以Sammi嘅幸福與快樂為大前提。

Sammi演唱會以一貫華麗打扮展開序幕

第2場演出由 林家謙 擔任嘉賓，佢同Sammi手拖手邊走邊唱《親密關係》，原來去年Sammi已原定邀請家謙，不過因為感染新冠而要押後演出，到今年再向對方提出邀請，家謙再次爽快應承，令Sammi非常感謝。Sammi指近年甚少機會認識樂壇生力軍，呢次係好機會之餘，又同家謙以表姐弟相稱。

第2場演出由林家謙擔任嘉賓

連續多場嘅個唱演出一啲都唔簡單，Sammi就分享咗佢喺後台身穿機械人裝，準備出場嘅花絮，除咗要顧動作又同時唱歌，最誇張係腳上一對十幾吋高嘅長靴，咪話要行同一直有唔同動作，要簡單保持平衡都唔係咁易呀。

原來機械人打扮包括一對超高踭長靴

而星期六晚第2場演出完成之後，Sammi返到酒店休息時亦喺社交平台出Post，妝都未落就同大家分享感受。有鐵人Mi稱號嘅佢仲話自己攰到不得了，非常期待星期一嘅休息日咁話。雖然體力大量消耗，不過Sammi就話要先翻睇整晚嘅演出檢討改善之處先可以休息喇。