提陳妍希婚變林心如即求饒 稱未有時間睇老公新劇

林心如呢日現身台北一個品牌活動，分享家事點滴。陳妍希早前驚傳婚變，作為好友嘅林心如喺訪問時，就話自己同對方已經有一段時間冇聯絡，但就話過年時同妍希母子聚會時，陳曉的確未有出席，之後心如又向在場媒體求饒，叫大家唔好再問相關問題呀。

至於講到佢同老公霍建華，兩人平時工作都咁忙，屋企嘅家務又會回分配？心如就話因為老公工作比自己更忙，所以平時唔係點使做家務，不過心如就讚老公好主動，好似食完飯會主動收拾碗筷，心如話自己唔算係寵老公，只係互相幫忙咋。

心如又指因為囡囡而家學緊畫畫，所以成日都會整到一身顏料，但因為佢自己鍾意買淺色衫畀囡囡着，所以愛女成日都搞到件衫好似調色盤咁呀。

講到霍建華同劉亦菲嘅內地劇集大獲好評，但身為老婆嘅心如就話自己仲未開始睇老公套劇，因為最近小朋友放暑假，所以平時只可以等到小朋友瞓覺後，先有時間睇屬於大人嘅電視，但因為陪囡囡太攰，對方瞓嗰陣自己都一齊瞓埋，所以都係等之後有時間先一次過追呀。至於講到唔少劇迷讚霍建華好帥，心如就話自己都有睇到大家嘅評語，佢仲話睇到劇照同剪輯嘅短片，自己都覺得個畫面好唯美呀。