陳瀅相約朱敏瀚打網球落傾盆大雨 做適量運動計劃年尾雪卵

陳瀅拍完新劇《執法者們》後，噚日喺社交平台貼出跟好友朱敏瀚相約打網球嘅影片，畫面見佢哋後面落住傾盆大雨。

陳瀅跟好友朱敏瀚相約打網球。

陳瀅與朱敏瀚拍《痞子殿下》成為老友，不時鬥嘴互窒，片中見陳瀅笑指朱敏瀚話唔會落雨，其後朱敏瀚喺IG貼出影片「反擊」，該畫面見現場已停雨，朱敏瀚反問：「邊度有落雨！」令陳瀅忍唔住大笑。陳瀅早前拍《家族榮耀之繼承者》時因太大食，受佘詩曼「軟功」叫佢食少啲嘢，陳瀅亦乖乖聽話減肥，見佢而家積極做運動，睇嚟呢位「堂家姐」好有影響力。

陳瀅受佘詩曼「軟功」叫佢食少啲嘢，以及積極做運動。

陳瀅近年減產一年拍一至兩部，盡量畀自己時間享受生活，對感情及工作要求抱住「佛系」心態，目前單身嘅陳瀅，早排接受傳媒訪問時稱忙埋手頭上嘅工作，年尾前有計劃雪卵。
好友JW早前自爆雪卵為谷卵10日注射21針，而目前單身嘅陳瀅，亦有計劃年尾前雪卵。