鄭秀文分享舞台鼓勵陳凱詠 為歌迷尋集體回憶邀任賢齊合唱

天后 鄭秀文 紅館騷嚟到第四場，呢晚就有好友 任賢齊 、蔡卓妍（阿Sa）、導演莊文強、蔡穎恩（Evelyn）與老公攝影師譚運佳、Vian@Me&、內地歌手蘇運瑩等捧場。

鄭秀文經過一日休息後繼續為演唱會演出
 
第四場表演嘉賓就由 陳凱詠 擔任， Sammi同Jace又唱又跳《煞科》，Jace更加入一段rap助興，全場High爆。Jace亦興奮高呼：「好夢幻呀，我同Sammi一齊唱歌呀！」完成合唱後二人緊緊相擁。第一次踏上紅館舞台，Jace就覺得：「感覺太神奇，好正呀，咁近距離感受Sammi嘅energy。」佢亦感謝Sammi曾經私下向佢打氣鼓勵， Sammi就話：「長路漫漫，前面嘅路係你哋架啦，你要加油呀！」

Jace陳凱詠呢晚應邀擔任嘉賓
 
Jace呢次嚟做嘉賓之餘，亦為Sammi準備咗一份特別禮物，就係一個湯壼喇！Jace解釋：「我本身諗住自己煲湯，但考慮Sammi健康，所以裏面係我寫嘅一張湯券，等你演唱會完成之後，可以隨時兌換我煲嘅湯。」Sammi笑說：「唔怪之得個壼輕飄飄啦！」

佢仲話原本打算為Sammi煲湯，不過最後就只得一張兌換券
 
嚟到演唱會尾聲， Sammi就對觀眾話：「我知你哋好需要集體回憶，鍾意比較熟悉嘅歌，大家記唔記得幾廿年前《夏日的麼麼茶》？『麼麼茶』今日嚟咗呀。」隨後小齊同觀眾打招呼，又好搞笑咁講：「『麼麼茶』一路喺馬來西亞嘅熱浪島等Sammi返嚟，等唔到，我就嚟香港搵你！點知我一返嚟香港，個個叫我『秋哥』，因為《九龍城寨之圍城》！」

曾同Sammi合作拍戲嘅小齊，呢日於觀眾席同Sammi合唱
 
小齊亦表示期待再同Sammi合作拍電影，二人又唱咗一段電影《夏日麼麼茶》主題曲《浪花一朵朵》，不過Sammi笑指小齊將「浪花」講成「老花」，廣東話有待進步，全場爆笑。