陳家樂學習做『多功能老公』 大讚連詩雅廚藝了得夠體貼

「愛妻號」兼準爸爸 陳家樂 近日夥拍師妹 鍾雅婷 （Alice）為一個餐廳拍攝全新電視廣告。喺廣告中，家樂繼續飾演愛錫老婆嘅「多功能老公」，喺廚房化身「愛的戰士」，為Alice擋蟹、齊齊炮製美味一餐。

家樂同師妹鍾雅婷近日拍攝新廣告

講到喺生活中，如何同真正老婆連詩雅（Shiga）保持婚姻生活甜蜜，家樂笑談：「我學習緊成為一個稱職嘅『多功能老公』。佢好多時候都同廣告一樣會大叫，而『等我嚟！』，不只成為日常口頭禪，更變成彼此嘅愛的宣言。」

當中佢仲要扮演一名多功能老公

喺廣告其中一幕，Alice喺廚房「倒瀉籮蟹」，家樂即盡顯老公本色，手執煲蓋上演英雄擋蟹，場面非常搞笑。家樂自言自己喺生活中係緊張大師：「平日外出瞻前顧後，好多時候反而被對方勸自己放鬆一啲。」

家樂喺廣告中為氹另一半而一口氣飲曬對方親自炮製嘅「伏」味章魚湯，演技十足嘅佢令人懷疑係咪無意間流露真情，家樂立即「耍手擰頭」，更笑言喺現實生活正正相反﹕「對方很喜歡下廚，而且廚藝了得。但而家唔方便出入廚房，所以間中都會由我親自下廚，但佢都會毫不忌諱咁向我面露難色！

太太Shiga臨盆在即，兩人即將榮升父母

雖然家樂經常因為工作而周圍走，但好在Shiga好識體諒老公，而家樂都好識做，唔洗開工時都會陪伴老婆，偶爾又會為對方送小驚喜，維持恩愛感情。