StarTalk｜Bosco拍追逐戲似跑馬拉松 被阿聰大爆享受單身自由市場

黃宗澤 張繼聰 同 陳家樂 主演嘅警匪系列電影拍到第三集，無論場景、打戲都繼續升級。Bosco同阿聰呢日作客《StarTalk》，就同大家分享電影拍攝點滴。

今集主角們於旺角鬧市拍攝追逐戲
Bosco話第三集繼續有大量追逐戲，仲搞笑話今次直頭係跑緊馬拉松：「上次係跑加連威老道，今次係跑彌敦道，再長啲添。」阿聰就話自己有練開跑步，所以對佢來講好輕鬆，不過明顯感受到兩位拍檔好吃力，所以自己都要盡量控制，唔好再加速。阿聰仲大爆：「我覺得Bosco都好啲，家樂好似感覺上再…可能佢啲力用咗喺其他地方。」
阿聰笑男主角中得返Bosco仲喺自由市場

阿聰係資深人夫同爸爸，家樂亦都啱啱做咗新手爸爸，三人當中剩返Bosco係單身，阿聰就形容Bosco係唯一一個自由市場，應該覺得好享受咁話。
Bosco就指拍攝時勾起唔少兒時回憶

Bosco話今次拍攝過程都勾起唔少兒時回憶，事關電影取景地就係佢舊居附近，佢回憶細個如果夜晚聽到樓下有人打交，阿媽都會特登叫佢起身睇，趁機提醒佢千祈唔好學壞。不過阿聰就話時代改變，教仔方式都要改變，大仔下年就成年，所以自己都摸索緊兩父子之間嘅溝通方式。

而單身嘅Bosco就話暫時想像唔到自己會係一個點樣嘅爸爸，不過如果有日真係為人父，自己都會盡心盡力做好個角色。