容祖兒新歌唱出自在快活態度 面對末日要開騷攬住歌迷到最後一刻

容祖兒（Joey）一連十二場嘅澳門演唱會日前正式開鑼，Joey喺演唱會上向歌迷透露正密鑼緊鼓籌備全新廣東大碟，預告喺接落嚟嘅場數會大唱即將推出嘅新歌，而Joey新廣東作品《One Last Time》亦喺7月18號正式上架。
 
Joey新廣東作品《One Last Time》亦喺7月18號正式上架。

呢首新歌由江海迦（Aga）作曲、陳詠謙填詞，一直欣賞Aga才華嘅Joey呢次主動出擊向對方邀歌：「佢係一個有才華嘅歌手，擅長創作R&B曲風，音樂觸感無容置疑。自己又有一段時間冇出快歌，就試吓問監製舒文，Aga有冇歌可以俾我，結果收到兩首Demo，好開心最後兩首都用到，其中一首就是《One Last Time》。」

一直欣賞Aga才華嘅Joey呢次主動出擊向對方邀歌。

至於歌詞方面，Joey就為陳詠謙設定一個有趣框架，要求要一首：「大家聽到就會不自覺一齊唱，一齊跳嘅歌，用字唔駛好深，要深入淺出咁講出嗰份態度。所以當大家聽到副歌一句『愛你愛我 我對你霸佔一晚 你對我霸佔一世 通通不阻你發揮』自自然然手腳會郁，亦都已經可跟住唱。」
 
Joey喺歌詞方面就為陳詠謙設定一個有趣框架。

Joey喺MV中化身導演，自編自導自演一場世界末日，充分體現「用自己態度面對世界末日」嘅歌曲宗旨，即使身於末世仍然要嬉戲到底。Joey喺兩日拍攝換上七個造型，遊走香港多個場景，包括花園街、尖沙咀美麗都大廈、電車廠等，帶領大家由另一角度欣賞平日或者都會經過嘅地方。
 
Joey喺MV中化身導演，自編自導自演一場世界末日，充分體現「用自己態度面對世界末日」嘅歌曲宗旨。

最後，導演更搭建一個好似廢墟一樣嘅家，期間會經歷百年一遇暴雨，又有猛烈嘅龍捲風，種種災難都比喻世界末日來臨，但Joey仍安坐家中，自在地投入唱歌跳舞。而講到如果真係要面對末日，會揀點樣面對？Joey就話：「我會開一個最大型嘅世界末日狂歡party演唱會，希望同班歌迷狂歡到最後一刻，大家攬住一齊……死，哈哈，就算世界末日都要開開心心咁過！」