草蜢獅城演出歌遊熱情滿分 當地回憶多唱陳潔儀經典

草蜢 上星期喺新加坡舉行一連兩場《GRASSHOPPER 2024 RE-UNION CONCERT》演唱會， 林珊珊 一家仲有 蔡一智 太太帶同仔女飛往當地欣賞，演出全場座無虛席，三子亦特別為當地樂迷換上全新舞台服裝，更演唱「新加坡國寶」陳潔儀嘅經典金曲《擔心》。

草蜢上星期到新加坡舉行演唱會

佢哋仲預告8月嘅佛山站、以及下一站美國演出都會增添唔同新元素，務求為樂迷帶來驚喜又歡樂嘅演出。

林珊珊同蔡一智家人都有往當地

草蜢三子以全新服裝拉開演唱序幕登場，接連唱出《好戲在後頭》、《華麗舞台》以及《三分鐘放縱》等節拍強勁嘅快歌，令觀眾尖叫聲四起，不斷揮動手上熒光棒。蔡一傑話：「為咗今次嘅演唱會，換咗一套新衫出場，畀新加坡朋友耳目一新嘅感覺。我條褲同件衫都好靚，加咗新元素會令自己起勁啲。」

到演唱會中段，草蜢走到台邊連環派心同飛吻，觀眾蜂擁與三子握手合照，獻唱《寶貝對不起》時又大派禮物，全場又唱又跳兼大玩人浪，猶如大型派對一樣。蘇志威話：「每次嚟到新加坡開演唱會，觀眾都好熱情、好瘋狂，佢哋愈投入，我哋就愈好玩。」蔡一智就興奮話：「同演唱會主題非常吻合，真係Reunion，所有鍾意草蜢嘅人都嚟晒，好似開咗一場好大嘅Party咁。每一首歌都跟住節拍搖熒光棒，我諗我今晚都瞓唔着，發夢都見到佢哋搖緊熒光棒。」

佢哋仲盛讚當地歌迷熱情如火

草蜢呢晚亦獻唱新歌《Framily》報答熱情觀眾，蔡一智指：「《Framily》係送畀所有愛草蜢嘅粉絲們，你哋就好似我哋嘅家人一樣。」蔡一傑亦特別唱出陳潔儀嘅經典歌《擔心》：「我哋原本邀請陳潔儀做嘉賓，但佢有啲事同唔到我哋一齊玩，佢答應下次一定會嚟做我哋嘉賓。大家都好喜歡我唱呢個版本嘅《擔心》，好開心得到好多掌聲。」

蔡一傑對陳潔儀未能現身覺得非常可惜

完場後觀眾意都未肯散去，搞到草蜢要再度上台，為樂迷二度Encore，先後唱出《我們都是這樣失戀的》、《愛拼才會贏》、《夢伴》仲有《失戀陣線聯盟》，蔡一智話：「下一站就係佛山，如果大家都夠熱情，可能又會有另外一啲驚喜，我哋會練定好多歌，隨時俾你哋點唱。」

蔡一智就指可一站將會繼續加入唔同新元素

今次新加坡之行亦勾起草蜢唔少回憶，蔡一傑話：「諗返起喺呢度錄唱片，新加坡嘅人對草蜢係非常之熱情。」蘇志威則話：「我最深刻係2000年，我哋三個一齊喺新加坡跨年演唱，喺電視台唱廣東歌，我哋都係第一個，呢啲都係我記得嘅小小事跡。」

蘇老闆則對當年於獅城跨年演出非常深刻