王君馨與三位人妻送驚喜 鍾嘉欣被姊妹感動到眼濕濕

李亞男 同 苟芸慧 早前就分享咗佢哋同埋 岑麗香 、 王君馨 四個姊妹一齊上佛山睇 鍾嘉欣 演唱會嘅相，30號王君馨就上載咗佢哋四位人妻偷偷由香港出發，去到佛山演唱會嘅後台，畀驚喜鍾嘉欣嘅片，片中鍾嘉欣見到四位好姊妹突然出現，仲開心到眼濕濕呀！

岑麗香、李亞男、王君馨同苟芸慧約埋一齊去畀驚喜鍾嘉欣。
王君馨、岑麗香、苟芸慧 同 李亞男 四位靚靚人妻，去到佛山後，一人拎住一束99枝唔同顏色嘅玫瑰花偷偷咁走入後台，打算畀一個大大嘅驚喜鍾嘉欣。起初坐喺化妝枱前嘅嘉欣，因為戴住耳筒聽緊歌，所以根本冇為意王君馨佢哋入咗嚟後台，直到王君馨佢哋企喺嘉欣背後，佢先後知後覺發現到眾人，然後就係好多驚訝同感動，嘉欣仲強忍淚水同幾位好姊妹逐一抱抱。

嘉欣感動到喊。嘉欣感動到喊。
喺後台送完驚喜後，四位人妻就乖乖坐返去前台欣賞嘉欣嘅演唱會，期間佢哋仲忘形地跟住一齊唱，又不時向台上嘅嘉欣畀心心。

佢哋睇完演唱會後再喺後台合照。