StarTalk｜河正宇呂珍九重現真實事件 當年九霄驚魂震撼人心

韓國男星 河正宇 同 呂珍九 以真實事件改編嘅新片即將公映，早前佢哋接受 王鎮泉 《StarTalk》專訪，就分享拍攝時嘅故事。扮演當中英雄人物嘅河正宇，就謙虛指出演繹上同其他作品未有大分別，不過一直維持緊繃情緒就一啲都唔易，而整個故事壓縮於一個多小時嘅電影中呈現，亦令整個團隊都面對重重挑戰，佢又指每日導演拍攝前都會要求演員集合綵排。

至於首次扮演反派嘅呂珍九，就提到拍攝前自己揣摩角色非常苦惱，因為要扮演人生背景非常複雜嘅角色，要表達佢嘅情緒而避免美化同英雄化，所以自己經常同導演深入討論先開始拍攝。

新片於狹窄機艙中拍攝，當中更有唔少打鬥場面，兩位演員就對其中打鬥場面非常印象深刻。其中一場要持械真正攻擊河正宇，呂珍九仲笑指曾誤中對方幾次。佢哋仲對早年嘅航班同航空知識多咗唔少了解呀。