直播靈接觸｜歐陽震華曾住兇宅與死神擦身而過 好友突入賀壽兼封民選視帝

由梁思浩主持嘅節目《直播靈接觸》圓滿結束，最後一集邀請重量級嘉賓歐陽震華做嘉賓，尾聲時錄影廠仲相當熱鬧，好友江美儀、滕麗名、楊明同莊思明突入為7月28號64歲生日嘅歐陽震華預祝生日，歐陽震華話生日同老婆傅潔嫻相隔一星期，故會一次過食飯簡單度過，唔會大搞派對。
歐陽震華成《直播靈接觸》嘅壓軸嘉賓。
節目組亦有準備可愛嘅Banner恭賀歐陽震華獲封民選視帝，早前TVB官方微博同新浪娛樂舉辦「你心中的TVB記憶」活動，等網民投票選出「民選TVB視帝視后」，最終由歐陽震華同佘詩曼稱帝封后，思浩話好開心喺節目最後一集請到呢位老友出山做壓軸嘉賓，歐陽震華笑指自己非重量級人馬，只係棋子一顆。
眾人嚟到現場為歐陽震華提前賀壽。
講到獲封民選視帝，歐陽震華最初一無所知，表示係「世界上最麻煩嘅佘詩曼」有日喺內地工作時，一早發微信畀佢，話「大爺你成為民選視帝」，再睇清楚阿佘係視后，真係托阿佘鴻福，好多謝支持自己嘅粉絲，喺幾十人當中揀咗佢。至於會否回娘家TVB拍劇？歐陽震華表示無所謂，為TVB服務超過40年，出去試吓唔同嘅嘢，幕前幕後都可以，笑稱自己可以同古仔古天樂一樣。
歐陽震華表示自己曾入住疑似兇宅。
而《直播靈接觸》最後一集，思浩大表不捨，仲話由節目開始至今已經多次加集數，令佢本身檔期有所延遲，現今要出去完成其他工作先，之後返回TVB工作。

歐陽震華於節目中除咗分享曾住疑似兇宅嘅經歷之外，透露2013年因急性肺炎入院，喺ICU昏迷期間嘅兩個奇遇，至今仍令佢歷歷在目，其一係高空望向自己情況，第二個係喺床上見到床邊有班瓦黑色嘅小矮人，佢哋似商量緊要唔要帶佢走，最後歐陽震華認為可能覺得佢為觀眾帶來咁多歡樂，得以倖存。