鍾柔美演邵美琪女兒興奮心態迎接挑戰 尋找兒時拍劇記憶助演出

鍾柔美(Yumi)同羅毓儀(Yuki)作客電台接受訪問，原來佢哋好快就會喺劇集上合作，拍攝暫名《臥底嬌娃》嘅新劇，Yumi雖然係童星出身，但近年專注歌唱，已經好一段日子冇拍劇，對上一次拍劇已經係三年前同《聲夢傳奇》嘅學員一齊拍攝校園電視劇《青春本我》。
Yuki同Yumi呢日雙雙接受電台訪問。
Yumi今次喺劇中會飾演邵美琪嘅女兒，令佢相當緊張，從未諗過獲安排一個咁大角色，Yumi雖然未曾與邵美琪見過面，但會以緊張興奮心態迎接挑戰。
Yumi將會喺新劇入面飾演邵美琪女兒。
日前Yumi孖姚焯菲(Chantel)同詹天文(Windy)三小花開騷後一直忙過不停，暫時未收到新劇劇本，故暫時對拍攝有少許空白，希望兒時拍劇嘅經驗有助佢今次演出，自己好驚講錯對白及背唔到對白，竭盡所能做好角色。
Yuki終於「進步」，喺新劇首度飾演女警。
同劇嘅Yuki就好開心喺角色上終於有成長，仲會首度出演女警角色，感覺好新鮮，Yuki自從藝員訓練班畢業後，好多同學都有機會做警察，唯獨佢未有機會，相隔四年終於輪到佢，心情興奮。