周嘉洛 吳偉豪 高海寧 黃智賢 謝嘉怡 黃子恆 吳子冲 等主演嘅TVB奇幻動作劇《武林》,經過近半年拍攝終於煞科,呢日眾演員同台前幕後喺煞科宴上分享拍攝經過,監製陳維冠同時宣布,佢嘅黃金拍檔導演高佬鍾國強完成呢套劇後正式榮休,眾人齊齊祝願佢退休後嘅人生可以過得更精彩。
呢晚既係《武林》煞科宴,同時亦係導演鍾國強嘅榮休派對
劇集之前去到台灣取景拍攝,嘉洛同Ricco呢對鬼馬兄弟因為日對夜對,感情大躍進,佢哋同房瞓咗19晚,嘉洛搞笑話,估唔到同男仔瞓都可以咁好玩。而且佢哋喺劇中仲有裸跑戲份,大家一定要好好期待。
嘉洛同Ricco晚晚同房,劇情更加要喺人來人往嘅夜市裸跑
有份裸跑嘅仲有56歲嘅阿Ben,而佢嘅狀態絕對唔會輸俾一班後生仔,阿Ben話自己入行幾十年,從來冇拍過咁嘅戲份,最尷尬嘅係仲要俾對手高Ling近距離咁望住添。
高ling早前特登到內地進修演技,並大曬畢業證書,分享難忘歷程,佢話好開心可以識到一班同學,而最難忘嘅經歷就係要毫無保留咁將自己攤開,不過亦因此有好大得著。
高Ling亦分享早前到內地主修演技嘅過程
話明套戲講武林,劇中幾乎各路門派嘅功夫都會出現,耍太極嘅馬海倫就試過耍足十幾個鐘太極,結果收工後揸車時腳抽筋,估唔到蔣祖曼都要相同經歷,好彩大家都有驚無險。
劇中會出現各路門派武功,唔知Lisa又會以咩形式現身呢?