《金式森林》內地煞科 安仔向劇中老婆陳曉華深情告白

以豪門家族鬥爭為主題嘅新劇《金式森林》，早前移師內地拍攝，近日內地嘅戲份終於完成，演員 郭晉安 陳曉華 羅子溢 何廣沛 莊子璇 羅天宇 龔慈恩 等，以及監製林志華同台前幕後工作人員，舉行內地煞科宴，連珍姐都專程嚟為劇組打氣。

新劇《金式森林》內地拍攝部份完成

煞科宴上大家為羅子溢慶祝生日
一眾演員更送上蛋糕，為子溢慶祝40歲生日。飾演忘年戀嘅安仔同Hera，喺劇中有深厚嘅感情，感性嘅Hera要同安仔暫別都好唔捨得，唔單止真情流露，呢對熒幕夫妻更上演肉麻情節，安仔嘅愛的宣言再次整喊Hera 「多謝你老婆，多謝呢兩個月，你做了我生命中最重要的一位女人，同你行呢條頭開頭好緊張，但慢慢我又覺得好放鬆，跟住又有啲戰鬥嘅感覺，去到尾聲好似又打贏呢場仗，我而家連望你都唔敢望，總之呢兩個月我覺得好被你愛嘅感覺，老婆你嫁比我得唔得？」而Hera亦坦言第一次見安仔好驚，因為同對方無交流，但拍完就發覺大家越來越好朋友。

扮演一對嘅郭晉安仲即場向陳曉華表白求婚
感動到Hera落淚擁抱安仔

另一邊廂，安仔就同Hilary、何廣沛、羅天宇、陳浚霆飾演一家人，安仔話同一班後生仔女合作，完全無代溝，拍得相當愉快，除咗何廣沛大讚安仔呢位三屆視帝演技真係無得頂之外，何依婷亦都大讚安仔好樂意給予後輩意見，真係令佢哋獲益良多。