相隔榻整整10年再開演唱會嘅 鍾嘉欣 於廣州舉行嘅演出星期六晚順利舉行,除咗全場座無虛席之外,Linda嘅好姊妹岑麗香、李亞男、苟芸慧、王君馨仲有好友黎諾懿夫婦,都齊齊拉隊到廣州捧場。
鍾嘉欣事隔10年之後再開演唱會
Linda一開場就以金曲《一顆不變的心》為演唱會揭開序幕,之後又以勁歌熱舞上陣,掀起熾熱氣氛。之後獻唱《我結婚了》時,Linda仲向台下觀眾拋花球,有如重現出嫁時嘅人生重要一刻。
連月準備演出嘅Linda狀態大勇
Linda為今次個唱連月來努力練歌排舞,最終不負所望,整晚共演繹21首歌曲,好似《其實我不快樂》、《一人晚餐》、《日夜想你》、《最幸福的事》等。不過《Love Love Love》、《得閒找你》同《夢伴》等以熱舞跳唱演繹,就令佢面對挑戰喇:「演唱會花咗好多心思,一步一步計劃出嚟,最大挑戰係跳唱環節,始終好多年冇跳舞,所以我跳出舒適圈好努力咁練習,好開心最後可以好順利完成,希望自己可以繼續做到老學到老,繼續挑戰新事物。」
呢晚佢唔止又唱又跳,仲向台下Fans拋花球
佢又指最難忘一幕係邊唱《我結婚了》邊向觀眾扔花球:「其實2015年突然結婚嘅消息,當時刺激咗好多錫我嘅人同粉絲,之後我再突然離開香港生活、生仔,好多粉絲都冇見證到我嘅婚禮,呢個環節好似之前結婚咁,分享番呢個重要時刻,而花球裡係好特別,有我寫嘅字句。」
Linda指當年決定結婚生子自覺忽略Fans
對於一班老友專誠到廣州撐場,Linda亦非常驚喜:「唔知佢哋會嚟,之前君馨又話要開會、亞男又話要返工,個個都好似好忙咁,佢哋突然間出現晒,好驚喜。」可惜家人並未能親身捧場:「今次家人冇嚟,因為太長途,佢哋都覺得有啲可惜,希望將來佢哋可以睇到一次我嘅演唱會,我同囡囡講『唔緊要,媽媽會繼續加油,下次睇我演唱會,演出會更加勁嘅』,而我老公,佢一定急不及待完騷後喺網上搵片嚟睇。」
岑麗香、李亞男、王君馨同苟云慧難得聚首,為Linda打氣
苦練多時嘅佢,完騷後又爆笑指要狂食煎炸熱氣美食補數:「我要食好多熱氣、好辣、好炸嘅嘢,因為之前要好好養聲練氣,飲食上都好節制,完騷當然要食餐勁,同埋想第一時間返加拿大見我老公同啲小朋友,好掛住佢哋,我哋日日都有視像,有時短暫嘅分離,會令大家關係更加思念。」
黎諾懿夫婦亦專誠到廣州捧場
Linda完騷後指要狂食熱氣香口美食補數咁話