法證先鋒VI｜黃宗澤 蔡潔 袁偉豪鐵三角回歸 王敏奕人間蒸發成查案軸心

TVB新劇《法證先鋒VI倖存者的救贖》星期一晚就會登場，劇中演員黃宗澤Bosco、蔡潔、袁偉豪、王敏奕Venus、馬貫東、傅嘉莉Kelly、戴祖儀Joey、林正鋒、郭珮文Juliana等現身宣傳活動。

「法證鐵三角」星期一晚起再為大家查案

席間演員們劇透少少情節畀觀眾，Venus會承接上一輯演重案組角色，今輯一開始就同余Sir Bocso結婚，兩人到日本度蜜月期間，Venus莫名其妙人間蒸發。難怪Bocso都話Venus嘅角色好重要，但就最悠閒，要最尾嗰集先搵到佢。

Venus嘅人間蒸發唔知同故事又有咩特別關係呢？

蔡潔、Bosco同袁偉豪集合法醫、鑑證同重案嘅鐵三角組合承接上一輯回歸角色系列，大家嘅默契有所昇華，由於今次合作變得更熟絡，嘈咬鬥嘴都多咗，所以三人都會將日常互寸大家嘅細節加插劇中，令觀眾睇起上嚟更有生活感，蔡潔更大讚Bosco暖男為演員提供愛心湯水。

蔡潔大讚Bosco為同事提供湯水超暖男

而Bosco喺Man姐佘詩曼主演嘅《新聞女王》最後一幕以彩蛋姿態出現，阿佘都有出Post為《法》劇宣傳，唔通阿佘都會以彩蛋現身劇中？Bosco笑指自己係閒人所以做彩蛋，冇本事請得郁阿佘，相信係有賴劇集監製鍾澍佳嘅邀請喎。

唔少上集有份演出嘅演員今輯會以全新角色出現，好似馬貫東同傅嘉莉就會演兩夫妻，二人多次合作，默契十足，傅嘉莉率先透露佢嘅身份係其中一位幸存者，喺劇中係情緒擔當，而馬貫東則是動作擔當。

馬貫東同傅嘉莉新一輯將扮演一對夫妻

劇中嘅重案組亦加入新血，包括戴祖儀、林正峰同郭珮文等，郭珮文自我介紹角色時指自己最主要係「遞報告」，令全場爆笑。而戴祖儀就話雖然好多戲份係飲咖啡，但都拍咗好多晚通宵。

Bosco麾下亦有新成員加入

《法證先鋒VI倖存者的救贖》8月12號起 星期一至五晚 20:30 翡翠台