丁噹預告香港騷走火辣性感路線 自爆恨同張學友演出雪狼湖

丁噹下個月即將來香港開騷，對粉絲來講絕對係一個超級好消息，因為佢對上一次喺香港開騷已經係十年前，所以丁噹話自己都好期待：「我們這次的演唱會跟十年前紅館不一樣，就是會更close，更近距離。」丁噹仲承諾一定會唱廣東歌，因為代表自己對香港歌迷嘅心意，佢仲預告會有一份特別嘅禮物送俾香港歌迷。

丁噹下個月即將來香港開騷！

之前丁噹喺內地同台灣開騷，都有唔少香港粉絲特登飛過去支持，因為感受到粉絲對自己嘅愛，所以丁噹亦希望以最佳狀態回饋大家。佢話自己特別注重身材管理，因為希望可以以火辣裝束示人。另外佢希望大家將演唱會當成一個大型卡拉OK，希望到時可以聽到全場大合唱。

丁噹仲承諾一定會唱廣東歌，因為代表自己對香港歌迷嘅心意，佢仲預告會有一份特別嘅禮物送俾香港歌迷。

雖然好耐冇喺香港開騷，不過丁噹一直有留意香港樂壇，佢話自己有好多心儀嘅香港歌手，包括鄭秀文、陳奕迅等，希望有機會可以同佢地合作。丁噹仲自爆曾經發夢同張學友一齊演《雪狼湖》，仲同學友自薦如果要重演《雪狼湖》，可以考慮下搵佢做女主角喎！