StarTalk丨戴祖儀被前輩寸樣同身材差委屈爆喊 寒冬下濕身拍MV震足兩粒鐘

戴祖儀相隔1年再推出新歌，呢日接受TVB娛樂新聞台節目《StarTalk》，跟主播 許文軒 暢談新歌MV捱凍拍攝，以及被前輩冷嘲熱諷嘅背後辛酸；戴祖儀今次新作充滿動漫熱血感覺，而佢本身都係動漫迷，佢對陳耀森填嘅詞大感驚喜，覺得新歌《全集中呼吸》好啱心意。

推出新歌《全集中呼吸》嘅Joey接受專訪

戴祖儀指每次緊張都係要深呼吸，過程係畀到勇氣畀自己，努力渡過難關，戴祖儀大爆拍攝新歌MV嘅辛酸，當日上山下海拍攝，正值寒冬之下，佢要濕身演出，感覺成個人全程喺度震，戴祖儀覺得最難係瞓喺水面，下面係冰涼刺骨嘅海水凍、上面係半濕半凍有陣寒風吹，戴祖儀笑指好痛苦，一路諗得未…完未呀！點知拍濕身場口都拍咗一、兩個鐘，戴祖儀覺得拍出嚟靚，感覺一切都值得。

佢仲提到由被欺凌到變得自信嘅故事

戴祖儀想借新歌為自己打氣，坦言自己唔係一個咁有勇氣嘅人，小學嗰陣試過被同學欺凌足足兩年，而佢做新人出歌曾收到大量負評，當時好唔開心好驚；戴祖儀又指試過被前輩冷嘲熱諷，前輩問點解公司要用佢，批評戴祖儀樣同身材差，當時戴祖儀以笑打圓場，之後衝咗去廁所爆喊覺得好委屈！