曾寶儀投訴爸爸曾志偉太忙 鄧麗欣開估被查身分證事件主角

由 曾寶儀 首度擔任監製嘅電影《愛情城事》，獲選為香港夏日國際電影節嘅閉幕電影，寶儀呢日同有份演出嘅鄧麗欣，以及導演黃綺琳現身首映禮。

曾寶儀、鄧麗欣同黃綺琳現身夏日國際電影節

寶儀為咗呢齣電影大碌人情卡，邀請咗多位新晉導演執導單元故事外，亦請到鄭秀文、李心潔、林嘉欣、張震、阮經天等演出，寶儀話估唔到監製嘅工作係咁辛苦，仲好多謝各方好友嘅幫助，但作為爸爸嘅曾志偉就好似冇咩表示，佢仲透過鏡頭問志偉幾時會入場收睇。寶儀又話自己曾經send過幾次劇本畀爸爸問意見，但係對方完全冇回覆過自己：「我諗係佢啲工作太忙碌喇，佢唔係好理我囉，點解佢啲工作會咁忙碌呢？係邊間公司咁多嘢做呢？」之後寶儀仲投訴話呢幾年都好少見到爸爸呀。

Stephy早前同Cookies部份成員遊澳門

Stephy呢次喺台灣拍咗3日戲，起初唔識台語嘅佢，仲擔心會同飾演佢爸爸嘅蔡振南溝通時會有障礙，後來先發現佢哋相當啱傾，Stephy同黃綺琳又大讚寶儀嘅監製功力，即使嚟到現場都冇擺款令大家有壓力。而黃綺琳就話完全唔覺得寶儀係第一次做監製，所有嘢都處理得井井有條。

提到早前Stephy早前同Cookies嘅姐妹相聚，眾人去到澳門賭場時就有人被查身分證，有人估計被查證嘅主角應該係Elaine何綺玲，呢日Stephy就為大家揭曉，指當日被查嘅其實係Miki楊愛瑾呀！