楊千嬅巡唱北京站圓滿落幕 難忘與葉蒨文林子祥首度同台表演

楊千嬅世界巡迴演唱會呢次唱到北京，千嬅更邀請到重量級前輩葉蒨文、林子祥擔任嘉賓，因合作《聲生不息》而結緣嘅三人將首度同台嘅合作舞台送俾北京場觀眾，令全場High爆。
 千嬅邀請到重量級前輩葉蒨文、林子祥擔任嘉賓。
三人合唱之餘亦重溫昔日喺《聲生不息》嘅合作點滴，千嬅又話，自己見到阿Lam現身時幾乎想喜極而泣。莎莉笑指千嬅當時係大家嘅班長，千嬅謙虛回應，因為自己當時情緒特別低落，真係好唔開心，所以希望當時冇得罪大家。莎莉就大讚千嬅當時將情緒隱藏得特別好，而且將場面照顧得好好，令老人家好開心。
 楊千嬅 與 莎莉。
事後千嬅形容以前認為同兩位前輩同台簡直係遙不可及嘅事，冇諗到可以有朝一日同兩位合作。至於阿Lam同莎莉就大讚千嬅團隊照顧得佢地好好，呢次北京之行非常好玩。
 楊千嬅喺舞台上感性分享入行以嚟點滴。
千嬅喺舞台上感性分享入行以嚟點滴，期間更一度哽咽，而佢多年前主演嘅代表作電影《新紮師妹》導演馬偉豪亦係呢晚嘅座上客之一，千嬅亦感性獻唱電影歌曲《勇》。
千嬅感性獻唱電影歌曲《勇》。