米雪人緣極佳9月狂食生日飯 黎燕珊榮升新手外婆自評95分

米雪與黎燕珊呢日現身支持一個兒童慈善粵劇大匯演嘅活動，希望為支援長者服務籌款，米雪一向凍齡有術，睇唔出今個月2號係佢69歲生日，人緣極佳嘅米雪，收到不少朋友邀約為佢慶祝生日，米雪喺9月狂食生日飯，已經食咗10個生日蛋糕。

米雪與黎燕珊呢日現身一個兒童慈善粵劇大匯演活動。

米雪今年生日願望係社會經濟好、個個都有工做，同埋世界和平，米雪話仲想喺演藝界接多啲好嘅劇本，下個月將喺新加坡舉行一個粵劇crossover，今次咁啱有機會將粵劇界朋友衝出香港，等大家可以與當地進行文化藝術交流。
米雪表示今個月有好多生日飯聚。
同場嘅黎燕珊拍完劇集，榮升新手外婆嘅珊姐，目前投入湊孫樂，佢自評有95分，珊姐笑指曾拒絕阿女，叫佢唔好返阿媽屋企坐月，佢指自己要去蒲、又要開工，本身又多朋友要應酬，不過珊姐聽到阿女返屋企好有安全感，即時心軟只好改變自己嘅諗法。
珊姐榮升新手外婆。