與黃德斌舞台劇演夫妻 葉童靜待TVB邀請拍劇

影后 葉童 為節目《無限超越班2》擔任導師，觀眾見識到佢嘅神級演技，葉童雖然近年減產，但係佢嘅演技可以話依然在線，而最近佢終於接演11月公演嘅舞台劇，為陳善之監製嘅劇目演出，而佢將會同黃德斌演兩夫婦。

葉童同黃德斌將首次合作演出舞台劇
首度同傳奇級影后合作，德斌都好緊張，性格內歛嘅佢，仲以葉小姐嚟稱呼拍檔，相當有距離感，講起同葉童讀對白嘅體驗，德斌都不其然一額汗，不過接觸後，德斌就話葉童其實一啲都唔惡，仲好nice，合作過程好舒服。而葉童就話好欣賞德斌fit爆嘅身形，仲打算向佢請教健身問題添。
經驗豐富嘅德斌呢日睇嚟相當緊張

舞台劇中，德斌演一位腦神經外科醫生同腦神經內科醫生嘅太太無法溝通，現實中經營婚姻超過30多年嘅葉童，都話唔少兩夫妻間嘅對白令佢相當有共鳴。之前葉童為節目擔任導師，希望為新一代演員傳承演出技巧，佢都話好樂意拍劇同新一輩演員合作，所以而家佢話等TVB邀請佢，仲話TVB係佢好鐘意嘅電視台，所以如果劇本合適嘅話，佢都樂意參與演出，而德斌就話之前因為檔期問題，錯過回巢拍劇，所以嚟緊如果檔期同劇本合適嘅話，亦都會考慮返TVB拍劇，咁觀眾們就要拭目以待啦。