著名動作指導董瑋認對家人有虧欠感 與蔡思韵新戲父女情感人

由劉俊謙、董瑋（Dee哥）、伍允龍、蔡思韵（Ceci）主演，梁冠堯及梁冠舜聯合執導嘅電影《武替道》即將喺月底上映。早前電影舉行多場優先場，反應非常熱烈，收穫大量好評。電影唔只傳遞香港武師嘅熱血精神，另一條父女感情線，亦深深打動觀眾。戲中Ceci飾演資深武指森哥（董瑋 飾）嘅女兒Cherry，佢一直對父親心存芥蒂，森哥想彌補關係，始終未得到女兒原諒...呢條父女感情線令唔少優先場觀眾睇完大讚Dee哥同Ceci演出自然流露，對箇中父女情深感共鳴。

《武替道》戲中Ceci飾演資深武指森哥（董瑋 飾）嘅女兒Cherry，佢一直對父親心存芥蒂，森哥想彌補關係，始終未得到女兒原諒。

 相隔7年Dee哥再現大銀幕，Ceci對於可以同大前輩合作亦深感榮幸，指Dee哥非常友善，相當關照後輩，而Ceci同大前輩相處時亦並無怯場，Ceci對於今次無緣拍動作戲而感到可惜，並希望下次再合作時可以有對打合作。至於Dee哥對於Ceci嘅評價亦相當高，指初次見面覺得對方身型高䠷，非常親切。不過Dee哥笑言如果Ceci與自己拍打戲可能會後悔，因自己喺指導動作時會比較嚴格，或許會「臭口臭面啲」，但目的係為咗令動作戲可以拍出最佳效果。 

呢條父女感情線令唔少優先場觀眾睇完大讚Dee哥同Ceci演出自然流露，對箇中父女情深感共鳴。

談到飾演森哥一角，Dee哥就指角色遭遇令佢更加投入演出，因為自己投身影圈多年，因為工作影響家庭上付出的時間，確實與角色一樣對家人有一種虧欠感：「你一投入角色，你就會令自己諗返起以前，即係自己屋企，即係你畀到幾多時間啲細路啊……加埋角色佢作為父親，永遠做得唔夠，因為戲入面佢自己性格嘅問題，即係稍為自私少少，所以我對角色感覺幾深刻㗎。」 當被問到今次參演會否想再回到幕前時，自80年代後專注做武指工作嘅Dee哥就表示：「我呢排都有幫人客串，只係呢部係演出上比較日子多啲啦，自己可以盡到幾多力，就出幾多力，但係你話主力做回演員，我諗就唔會。」 

相隔7年Dee哥再現大銀幕，Ceci對於可以同大前輩合作亦深感榮幸。

Dee哥又指現時自己更想為香港電影業嘅年青一代作出支持：「你亦都睇到香港有一班新演員，新導演，甚至乎新幕後工作人員喺度鍥而不捨付出緊，我好感動。」Dee哥讚揚戲中一眾年青嘅幕後人員，大家喺刻苦條件下依然努力付出。 至於Ceci男朋友阿謙喺戲中演熱血武師，經常被打到周身傷，Ceci被問到有冇心痛對方時，佢坦率表示：「無心痛。我只係覺得佢係一個專業嘅演員……最緊要係我都好相信佢，同埋好相信動作指導係會安全咁樣去做到。」佢反而對阿謙能夠親身上陣演出動作戲，感到開心。