電影泉攻略丨林嘉欣自爆演親熱戲冇難度 聽到阮經天低沉聲線即入戲丨EP121

 王鎮泉Jeoffrey 每星期為觀眾提供最熱辣電影資訊，中外猛片專訪花絮上映時間全部集齊，《電影泉攻略》個個星期陪你睇新戲。

曾寶儀監製嘅電影《愛情城事》，由10位導演聯手執導10個單元故事，呢日佢就同戲中單元《病源》嘅主演林嘉欣、阮經天，上到嚟《電影泉攻略》傾下偈。首次做監製嘅寶儀，就話因為有10個單元嘅關係，無論導演、創作團隊同演員都有10組，所以喺溝通上增加咗唔少難度。

曾寶儀監製嘅電影《愛情城事》當中包含10個故事嘉欣就話雖然寶儀今次係碌盡人情卡，但作為演員都會有私心想拍好嘅作品，所以當見到呢啲卡士、主創同埋寶儀時，作為演員都會好放心，大家亦好樂意去完成呢個作品。至於小天就以姆指同食指嚟比喻寶儀係「小小隻」，又指雖然對方係小小隻，但每次拍攝時無論現場環境好定壞，對方都一定會藏喺咪後，以免打擾到演員，而呢個行為令小天覺得好有愛。

寶儀指好多人都誤會佢今次碌咗好多人情卡，但佢話呢個陣容唔係可以靠碌人情卡碌嚟，係演員們都鍾意呢個故事、鍾意呢位拍檔、鍾意導演，希望想同對方合作，先會肯嚟演出。

今次喺戲中小天同嘉欣有唔少親熱戲，嘉欣就話發現自己可以好快入戲嘅原因，係因為小天講嘢把聲好沉，可以令佢好快進行狀態，講完後嘉欣仲好有默契咁同寶儀Give me five，而每當再提起小天把低沉靚聲，嘉欣都會笑到停唔到，搞到小天都尷尬到忍唔住同佢講：「今天這樣可以了。」 

本週新片速遞有《變形金剛 初始篇》講「變形金剛宇宙」初始故事，將見證奧萊恩派斯與D-16，點樣由情同手足嘅夥伴，變成誓不兩立嘅死敵柯柏文與麥加登。而聲演柯柏文嘅雷神Chris Hemsworth，就話可以成為呢個系列嘅一份子，感覺相當夢幻。至於喺片中聲演Elita-1嘅黑寡婦Scarlett Johansson，就同大家分享佢個角色性格同背景。由於今次要聲演年青版嘅柯柏文，所以Chris指喺聲音上要有所調節，而成個過程係非常好玩。Scarlett就話自己好享受配音呢類精細嘅工作。

《變形金剛 初始篇》將公開柯柏文同麥加登成仇嘅緣由

同為本週新片嘅《BIG 816》，導演魏德聖同戲中嘅小演員鄭又菲亦嚟到《電影泉攻略》介紹佢哋嘅新片。戲中飾演癌病兒童嘅鄭又菲，坦言呢次電影對佢嚟講係一個好大嘅挑戰，戲中佢仲要要剃光頭演出；而魏德聖就話當初菲菲聽到要剃光頭就好抗拒演出，係後來大家慢慢說服對方。拍攝剃光頭嘅戲份時，導演要求菲菲唔可以喊，所以菲菲就同自己講唔好喊，加上佢覺得呢套電影可以幫到現實中患病兒童勇敢去面對，所以抱住呢個心態佢先冇喊。

魏德聖同小演員鄭又菲分享拍攝《BIG 816》嘅點滴

對於被指今次係執導以嚟喺片場最溫柔嘅一次，魏德聖就話由開拍嘅時候就知道呢套係唔可以心急、要慢慢嚟嘅戲，所以全劇組都有為呢件事做好心理上嘅調整。而曾經拍過電視劇《想見你》嘅菲菲，就指自己心態上有所轉變，以前佢唔會理成個故事係講咩，只係會處理好自己演出嘅部分，但今次佢就有好好了解過成個故事喇。