《武替道》氣勢如虹4日票房直逼3百萬 伍允龍起飛腳偕「威家班」戲院造勢

由梁冠堯及梁冠舜聯合執導，劉俊謙、董瑋（Dee哥）、伍允龍（Philip ）及蔡思韵（Ceci）主演嘅電影《武替道》上周四上映至周日為止，票房直逼3百萬港元，戲中不論動作或文戲，一眾演員落力演出皆感動咗唔少觀眾。剛喺歐洲工作完返嚟嘅伍允龍，噚日（29號）甫落機便急不及待與張達倫四出謝票。而喺戲中有份參與演出嘅「威家班」幾位動作演員即場度招表演功夫造勢，吸引唔少觀眾圍觀。

電影《武替道》上周四上映至周日為止，票房直逼3百萬港元。
對於票房成績穩步上升，伍允龍感到興奮；希望聽日10.1假期有更多觀眾入場支持。儘管近半年香港電影票房慘淡，但伍允龍仍有信心：「只要多啲人入戲院睇香港電影，就會有香港電影炮製出嚟，所以我哋感謝大家支持。」

謝票團隊與得獎觀眾。
伍允龍指《武》預算唔高，拍攝時間緊逼，認為好多嘢唔在乎時間長久，反而合作嘅團隊精神更為重要，佢最感恩係有熟悉動作電影嘅江道海導演同兩位梁導把關，令動作演出上唔算辛苦，而且文戲同武戲都能吸引觀眾欣賞。

剛喺歐洲工作完返嚟嘅伍允龍，噚日甫落機便急不及待與張達倫四出謝票。

張達倫感到鼓舞係觀眾對佢喺戲中同劉俊謙嘅兄弟情為之感動，噚日有男觀眾更點名讚賞，令張達倫開心不已。張達倫透露之前帶7歲阿仔張凱碩（Zachary）入場睇，冇諗過睇完呢部電影後，阿仔竟然愛上動作片，阿倫仲即場向伍允龍請有冇功夫老師推薦，想帶阿仔學功夫強身健體  、鍛鍊膽量 。伍允龍推薦自己上陣，建議小朋友最好先學柔道，學識點樣安全倒地而唔會受傷。伍允龍坦言自己香港冇開武館，但自己做動作導演多年，早已有一班徒弟，而其中一位徒弟已喺荷里活擔任主角替身，令佢感到欣慰，可以發揚光大衝出香港。

張達倫透露之前帶7歲阿仔張凱碩入場睇，阿仔竟然愛上動作片。
被問可有人慕名而來拜師，伍允龍就話過往不少圈中藝人朋友有搵佢指點功夫，包括霆鋒、女團組合2R，以及一啲經理人公司旗下藝人等，果然桃李滿門。

張達倫感到鼓舞係觀眾對佢喺戲中同劉俊謙嘅兄弟情為之感動，噚日有男觀眾更點名讚賞。