Twins巡迴廣州站自嘲係西瓜 11月赴歐美演出阿Sa期待見舊友

Twins嘅世界巡迴演唱會日前於廣州完成兩場演出，兩晚表演都全場爆滿坐無虛設，氣氛仲熱烈到幾乎首首歌都萬人大合唱。由年初巡迴演唱喺香港拉開序幕之後，已經舉行25場演出，緊接將舉行汕頭同佛山站，11月就會轉往美加、英國同新加坡等地開唱。

Twins日前舉行巡迴演唱會廣州站
廣州站仲有「Twins點歌Fans唱」環節，全場萬人合唱《死性不改》，歌聲響徹場館，令Twins非常感動。呢站佢哋又以粉紅粉綠新歌衫出場，阿嬌仲笑言：「網上留言有人話我似西蘭花，哈哈。」阿Sa就話，「我覺得我哋係西瓜囉。我係西瓜肉，你係出面塊皮，哈哈哈。」
阿Sa搞笑自嘲新歌衫係西瓜肉色

阿嬌則指網上見到有評論指自己似西蘭花

第二場Encore環節，阿Sa一度表示身體不適，更一度坐喺舞台休息，之後再用盡氣力，接連演出兩首快歌。演唱會結束後，阿Sa返港即量體溫，結果 「37.5」輕微發燒。阿Sa事後話：「休息過後已經好返好多，冇再燒啦！噚晚就真係唱到最後，係台上面係用生命嚟唱歌，用意志力叫自己頂住。但係觀眾，歌迷太好啦反應太勁，好似不停幫我打緊強心針咁，最尾兩隻快歌直頭投入到都唔記得咗自己頭痛頭暈啦。」
演出期間阿Sa一度不適

Twins將會到溫哥華開騷，阿Sa嘅生日會喺演出中度過，佢話「11月就開始外巡啦，會去英國、美國、加拿大、新加坡等等地方，會喺多倫多過生日，11月20號就係溫哥華演唱會，之後23日就過多倫多唱，正日會喺係嗰邊同親友、小學同學見面。好多年冇見佢哋，終於有一年可以一齊過生日囉，都幾期待。」

Twins下月將到美加演出

阿嬌則話：「上次係我演唱會慶祝生日，今次就到阿Sa生日要工作中過，不過有我哋大家陪住佢，都應該會好開心嘅。」阿嬌生日時阿Sa曾於紅館為佢準備萬人舉牌大合唱，問到阿嬌會唔會為阿Sa準備神祕禮物，佢笑道：「我唔識搞驚喜呀，但我聽歌迷講，話會喺拿大幫我地搞神祕應援慶祝阿Sa生日，所以我就交俾佢哋負責，希望佢哋會俾驚喜我哋啦。」

阿Sa將於加拿大迎接生日