古天樂盼電影能順利入圍奧斯卡 胡子彤準備冧歌答謝粉絲

由古天樂、林峯等主演，以九龍城寨為背景嘅電影《九龍城寨之圍城》，日前宣布獲提名代表香港角逐第97屆奧斯卡金像獎「最佳國際劇情片」，呢日古仔就聯同林峯、張文傑、胡子彤、伍允龍等一齊演員，現身戲院謝票。

《九龍城寨之圍城》眾演員現身戲院謝票。
心情大好嘅古仔，仲邀請咗在場cosplay成戲中角色嘅觀眾一齊大合照，而講到對套戲有幾大信心可以代表香港入圍奧斯卡，古仔就話可以代表香港角逐已經好開心同榮幸，由於仲有一輪輪選，古仔希望呢套戲可以越行越遠，有機會參加奧斯卡，喺頒獎台上可以攞獎。
胡子彤、張文傑、林峯、伍允龍現身戲院謝票。
喺謝票現場提到《九龍城寨之圍城》嚟緊會有新計劃，古仔透露會原班人馬拍另一部電影，但題材就唔再係城寨題材，而戲中佢哋嘅職業就會有少少動作場面呀。
古天樂表示嚟緊會原班人馬再拍電影。
電影為古仔吸納唔少年輕粉絲，佢哋更多方位對古仔進行考古，唔少人仲許願希望再睇到古仔跳拜神舞，呢日就有位幸運fans畀佢揀中，雖然古仔冇同對方一齊跳，但就全程喺身邊睇住對方表演，事後問到古仔點解唔滿足fans願望？佢就一臉無奈咁話：「唔好啦，Daddy幾廿歲唔好搞啲咁嘅嘢，佢自己跳咪得囉，咁開心。許願嚟講呢就睇佢拜開咩神啦，去返嗰個廟度就會好啲嘅，呢個戲院嚟，冇乜用㗎。」至於問到會唔會有fans可以幸運地有機會同佢一齊跳？古仔即斬釘截鐵咁話絕對冇呀！
胡子彤獲fans直球示愛。
觀眾為搏得同偶像互動嘅機會都各出奇招，其中有位女fans就高舉「娶我」嘅紙牌表白，作為怕羞仔嘅子彤同對方合照時都搞到滿頭大汗，不過佢就好感謝大家咁支持，同時又表示已經準備咗一首歌作為禮物送畀大家，而喺子彤錄歌時有到現場嘅林峯，就指呢首歌可以用一個「冧」字嚟評價喇！
林峯表示想借宣傳電影為名去旅行。
嚟緊電影將會喺韓國上映，同時亦會繼續參展各地嘅電影節，林峯同張文傑就話都想借宣傳為名出去玩下。