汪明荃羅家英為東華演出折子戲 阿姐忙為演唱會練歌兼keep fit

汪明荃近日忙於籌備11月紅館演唱會，百忙中抽空同老公羅家英為大型籌款節目《歡樂滿東華》嘅折子戲提前錄影。阿姐話呢排已開始為演唱會練歌，仲做埋gym為個唱keep fit。

汪明荃同老公羅家英為大型籌款節目《歡樂滿東華》嘅折子戲提前錄影。
家英哥就一早預告會出現喺阿姐個唱，暫時未知會做咩表演。家英哥搞笑話自己絕對唔可以叫做神秘嘉賓，如果自己唔出現先至夠神秘。

阿姐話呢排已開始為演唱會練歌，仲做埋gym為個唱keep fit。
阿姐日前喺社交平台分享自己參加網上節目，親手斟100杯熱咖啡嘅相，仲留言話為咗宣傳演唱會，乜嘢宣傳都可以做，講起今次斟咖啡嘅體驗，見慣大場面嘅阿姐就話冇難度啦！
阿姐忙演唱會，家英哥同樣唔得閒，佢嚟緊要帶隊去泰國同馬來西亞做粵劇交流，希望可以將粵劇文化推廣到更多地方。