陳瀅生日開工收劇組驚喜 有信心組真正女團

新劇《特勤女團》正拍攝得如火如荼，而10月22號就係 陳瀅 35歲生日，雖然要喺工作中度過，不過大家就為Jeannie送上難忘慶生驚喜！唔只有生日蛋糕， 羅毓儀 更精心準備禮物為Jeannie慶祝。

陳瀅生日同時要拍劇，不過就有同劇拍榴為佢慶祝喇
Yuki就話，因為Jeannie英文名同燈神同名，所以佢就揀左紫色神燈以及花花作為禮物，而且為求逼真，Yuki更為禮物注煙製造神秘效果！不過喺大家向壽星女揭曉禮物時，就唔小心發生咗個小意外令神燈跌低，事後Yuki都覺得唔好意思。 

Yuki為Jeannie準備一個神燈造型蛋糕慶祝

被大家疼錫嘅Jeannie收到滿滿嘅愛都好感動，而講到生日願望，佢就話人越大反而願望越簡單，身體健康最重要。雖然正日生日要開工，不過Jeannie早前已經同朋友食飯慶祝，之後亦會約埋同劇好友們一齊去張曦雯（Kelly）屋企玩，令佢都好期待。 Jeannie、Yuki、Kelly、Yumi鍾柔美四個女仔因拍劇結緣，感情亦變得越來越好更有畋契，又不時一齊拍跳舞片擺上網，好似真正女團一樣。Jeannie就話最初自己對「女團」都冇咩信心，但經過呢段時間嘅訓練後，自己慢慢都覺得開始上軌道，又笑言有信心真係同大家組真女團。