吳君如「三喜臨門」獲倫敦東亞電影節榮譽獎 欲探望當地留學愛女慘食檸檬

影后吳君如再添國際殊榮！英國時間10月23日晚，第9屆倫敦東亞電影節開幕禮上，吳君如獲頒發榮譽獎 (Honorary Award)，表揚佢對亞洲電影嘅傑出貢獻。身穿高貴黑色晚裝嘅君如，親自上台向現場觀眾發表真摯得獎感言，《我談的那場戀愛》亦成功入圍倫敦東亞電影節競賽單元，成為今次影展嘅一大亮點。

吳君如喺第9屆倫敦東亞電影節開幕禮上獲頒發榮譽獎 ，表揚佢對亞洲電影嘅傑出貢獻。
君如感恩自己今年「三喜臨門」，此前剛於第44屆夏威夷國際電影節獲頒「焦點香港影人」大獎，並憑《我談的那場戀愛》入圍金馬影后，呢次再度喺海外影展獲得肯定，令佢深感意義非凡。

《我談的那場戀愛》亦成功入圍倫敦東亞電影節競賽單元，成為今次影展嘅一大亮點。
君如笑言今年得獎之旅如同「終身成就獎」並分享：「中國人話齋就係雙喜臨門，到目前為止今年有三喜啦，就係夏威夷攞完，跟住金馬獎有提名，去埋倫敦咯。」君如更喺致謝辭強調會繼續堅持演戲至最後一刻：「我話我會做到最後嗰日都會繼續演，同埋我成日覺得自己好彩就係女演員，35歲已經冇得演，40歲可能更加冇得演，但我而家演到呢個歲數仲有得演，所以係好好彩同埋好感恩。」

曾出演《黑暗榮耀》韓國女星林智妍亦有出席。兩位港韓影星同場交流，成為當晚焦點。
倫敦東亞電影節榮譽獎，得主均為對亞洲電影有傑出貢獻的電影人及演員，並非常設獎項，上任得主為2022年《魷魚遊戲》韓星李政宰，而喺開幕禮上，曾出演《黑暗榮耀》韓國女星林智妍亦有出席。兩位港韓影星同場交流，成為當晚焦點。

君如老友黃偉文專程盛裝現身，共同慶祝佢呢個重要時刻。
君如老友黃偉文專程盛裝現身，共同慶祝佢呢個重要時刻，而君如亦會喺倫敦謝票，到時佢會睇吓外國觀眾嘅反應，諗起都覺得好正好期待。君如本應趁此行探望喺當地留學嘅愛女Jillian，但佢話竟未能如願：「我話我嚟攞獎啊，叫佢出嚟支持我，佢話佢而家好忙好忙好忙啊，所以我都未見到佢啊，佢好多功課啊，都好嘅，我都好安樂嘅，佢咁勤力，哈哈！」

君如本應趁此行探望喺當地留學嘅愛女Jillian，點知阿女話好忙好忙！