焚城｜開畫即衝逾400萬票房謝票停不了 演員消防打扮推慈善月曆籌款

破天荒以香港呢個彈丸之地作故事背景嘅災難片《焚城》正式公映，新片上畫首日累積票房更衝破380萬，勇奪開畫票房之冠，亦成為2024年下半年開畫最高票房港產片，淡市之下創出佳績。

《焚城》周五正式上映，瞬即成為票房冠軍
演員團隊 謝君豪 王菀之 王丹妮 何啟華 魏浚笙 林家熙 同剛出席完東京電影節返港嘅 許恩怡，仲組成謝票先頭部隊，四出到戲院答謝觀眾支持。扮演消防嘅幾位4位男士同Louise仲以片中嘅消防打扮出場。仲宣布《焚城》同《破・地獄》嘅限量電影套票，開售3小時內已全數售罄，亦公開一眾演員以消防員造型拍攝嘅「一世隊友2025慈善月曆」，稍後將進行慈善義賣。
片中演員仲以消防造型拍攝慈善月曆

消防月曆中演員擺出既性感又有型嘅甫士，Jeffrey仲笑言：「我哋咁嘅身型都願意畀機會我哋出寫真月曆，大家真係畀曬面喇。」

提到兩套重磅港片聯乘的套票迅速售罄，有記者問到會否加碼推出，Louise就表示：「物以罕為貴，希望觀眾覺得好睇之後，再宣傳畀身邊嘅朋友，一齊畀錢買飛入場支持《焚城》！」
新片同《破．地獄》嘅奪票同日推出，亦快速售罄

佢哋又分享拍攝感受，Locker就難忘曾遇上惡劣天氣喇：「有日橫風橫雨，啲帳篷都吹跌，大家團結一心咁每人捉住一邊，就連導演明哥同老闆(監製江志強)都一齊幫手。」Natalie就指災難電影少不了避難墟冚場面：「美術組搭出一個好真實嘅避難所，好細緻，我哋𠴱日同超過300個群演一齊通宵拍，而我仲要演感情戲，好驚自己演唔好阻礙大家，但最後成功咗。」
呢日幾位演員到唔同場次謝票，亦同大家分享拍攝感受

而Ivana就榮幸有份參與呢部大製作：「老闆同導演覺得呢套戲係一部講香港嘅電影，所以要求香港實景拍攝，我知道回收場係用4幅空地拼湊而成，當中道具、場景製作都係一絲不苟。」
佢哋亦希望呢部全本港取景嘅災難片，可以吸引觀眾入場支持

至於謝君豪就再感謝出品人兼監製江志強：「令我最感動嘅係而家呢個市道，好似有個傻傻哋嘅投資人，拎咁多錢出嚟投資呢部戲，始終災難片比劇情片投資更多，個風險係好大，好熱愛電影嘅人先會咁做，故此希望大家多啲入場支持！」