賴慰玲懷孕未能與囝囝跑3K賽 兩位契媽蔡思貝吳嘉禧陪跑

賴慰玲Winki 嘅囝囝Marat早前參加咗一個樂園嘅跑步賽事，不過由於Winki正懷第二胎，只可以做啦啦隊喺起點同終點為佢打氣，而陪Marat完成 3K 賽事嘅重任，就交由兩位都有跑開步嘅契媽 蔡思貝 與 吳嘉禧Cheronna 負責喇！
兩位契媽一齊陪Marat跑 3K。
Winki將當日嘅相上載到社交平台，佢指囝囝Marat非常重視呢次3K賽事，除咗不斷練跑外，仲緊張到瞓唔着，成日問Winki點樣可以令自己跑快啲，Winki喺帖文中表示：「我知以我而家身勢係無可能追到佢嘅，所以佢好幸運有兩位跑開嘅契媽媽。」
完成賽事！
由於今次跑步嘅路線會經過主題樂園嘅唔同設施，所以兩位契媽同Marat跑步時都有拍低成個過程，期間佢哋仲問Marat要唔要喺唔同景點前面打卡？不過因為Marat一心想盡快跑完，所以狠狠咁拒絕咗兩位契媽，再飛快咁全速前進，最後佢哋三個以第16、17、18名到達終點。
佢哋遇到都係嚟參加賽事嘅黃美棋同老公Ray。
跑完3K嘅賽事後，眾人就喺樂園遊玩，期間除咗遇到黃美棋同老公鍾健威外，佢哋用餐時仲遇見米妮，當米妮見到Winki時即忍唔住雙手摸住對方個肚，再用鼻哥同肚入面嘅BB打招呼。

Winki遇上米妮。跑完步眾人喺樂園遊玩。