吳姍儒喊話爸爸努力賺錢養外孫 吳宗憲贈歌周杰倫似有弦外之音

台灣主持人吳姍儒九月誕下細仔，上個月中坐完月復出主持金鐘獎，之後除咗同爸爸吳宗憲去咗轉澳門做嘢，多數時間都留喺屋企湊B，呢日佢終於正式回歸同爸爸主持嘅節目《小明星大跟班》，Sandy話因為主持金鐘獎壓力太大，所以又返屋企匿埋大半個月。Sandy仲同大家分享產後身體恢復狀態，話自己因為坐月坐得好，所以身體恢復理想，反而係爸爸憲哥好擔心佢。
吳姍儒產後首次錄影節目。
呢日Sandy產後首次錄影，節目組相當有心，送咗架雙人座BB車畀Sandy，但點都唔及憲哥大手筆，送咗架新車比寶貝女同外孫。Sandy話因為屋企多咗個小朋友，要加多個安全座椅，所以要求爸爸送部大車，憲哥當然二話不說有求必應。憲哥搞笑話養小朋友使費大，自己養大四個所以好清楚，希望Sandy兩個就夠，唔好再生，而Sandy就即場叫爸爸要繼續努力賺錢，因為一對外孫同外孫女都要靠佢養，兩父女不停耍花槍，相當搞笑。
節目組送咗架雙人座BB車畀Sandy。

節目組送咗架雙人座BB車畀Sandy。
而講到周杰倫下個月將於台北大巨蛋開騷，演唱會一票難求，憲哥身為周董嘅恩師，當然有好多人搵佢幫手買飛，不過憲哥竟然話，因為唔想造成騷動，所以冇打算去撐場。之前一度盛傳兩師徒關係決裂，憲哥呢日就澄清話自己係周董嘅鐵粉，不過講講下憲哥忍唔住憑歌寄意，話又唱首《你比從前快樂》送比周董，似乎又真係有啲弦外之音。