阿Sa賀歲片煞科獲劇組送蛋糕藏驚喜 張繼聰狂度橋被爆笑到扭傷頸

蔡卓妍 阿Sa近日飛往加拿大舉行TWINS嘅巡迴演唱會，而佢之前同 張繼聰 吳家忻 朱栢康 胡楓 洪嘉豪 楊偉倫 楊偲泳 等合作嘅賀歲片《祥賭必贏》原來已極速煞科完工，當日劇組仲為阿Sa提早慶祝生日。

阿Sa獲賀歲片劇組為佢提前慶祝生日
《祥賭必贏》日前正式煞科，煞科戲於一間麻雀館拍攝，阿Sa、阿聰、Kayan同修哥等演員齊聚片場為阿Sa慶祝，訂製生日蛋糕上有啤牌、籌碼、麻雀同金幣等賀歲元素裝飾，又有寓意「大紅大紫」嘅現金驚喜，阿Sa驚喜拉出一張接一張嘅紙鈔，仲話：「現金呀，係現金呀，我第一次收咁嘅蛋糕呀！好鍾意個蛋糕啊，鍾意個餡呀，哈哈！」而拍檔阿聰就帶領劇組唱生日歌，場面熱鬧非常。
呢日煞科戲喺一間麻雀館取景

電影拍攝一個月轉眼完成，阿聰指每日同大家即興創作爆笑橋段：「我覺得成個過程係超開心，亦都非常之愉快。我希望將呢個快樂放落電影，剪接到一個好快樂嘅作品畀大家睇。」而阿Sa就話：「好耐未試過拍一套戲個過程咁開心，每一日都好期待返工，可以同大家玩，一齊創作更加多好好笑嘅情景同埋人物。我覺得太正喇，有少少唔捨得。」
阿Sa呢日仲爆張幾聰拍攝時笑到扭傷頸

阿Sa仲爆料阿聰拍戲笑到扭傷頸，阿聰亦話：「朱康話笑到第日起身周身痛，拍到腹肌痛啊真係！」