1121壽星集合！陳煒獲老公送花甜在心 伍仲衡顏志恒聯合開生日會慶祝

11月21號呢日娛樂圈相當多壽星，其中《中年好聲音》家族經已有三位喺11月21號生日嘅朋友，包括《中聲2》嘅大馬唱將 沈宗賢 《中聲》唱將 顏志恒 同評審 伍仲衡 ，另外仲有美麗動人嘅煒哥 陳煒 同 姚子羚。

「中聲」家族原來有三人都係11月21號生日，其中一位就係伍仲衡

Benson顏志恒亦係21號生日

日前同大班Fans見面嘅沈宗賢亦係呢日嘅壽星
陳煒亦喺社交平台貼出手捧蛋糕同收花嘅靚相，並留言多謝Honey，相信束花係煒哥嘅醫生老公所贈。而一眾圈中好友同後輩朱晨麗、江嘉敏、陳自瑤、林夏薇、郭柏姸、連詩雅、炎明熹等都有留言送祝賀，煒哥嘅粉絲「陳村粉」亦有出貼文送偶像生日快樂，原來唔經唔覺經已51歲，見到煒哥淡妝依然明艷照人堪稱美魔女天花板。

煒哥一早已經收到蛋糕同鮮花祝賀，睇字牌都信到實係老公送喇

Elaine亦係天蠍女
姚子羚早前同粉絲們一齊開生日會提前慶祝，而中聲家族兩位同月同日生嘅壽星伍仲衡同埋顏志恒就會喺11月22號聯合開生日會，同兩邊嘅粉絲以及中聲家族熱鬧慶祝。

女團XiX嘅成員Kiele鄧曉殷亦喺20號迎來18歲生日，因為Kiele遠在美國讀書，XiX幾位成員都喺限時動態貼出合照祝Kiele生日快樂，當中亦包括已經離隊嘅Vici。而Kiele轉發多謝大家之外，亦貼出童年舊照，回顧成長片段。
Kiele鄧曉殷剛剛踏入18歲，隊員紛紛祝賀身在美國讀書嘅佢

佢又亦以英文發表成年感言，鼓勵自己繼續為夢想努力:「I’m proud of how for you’ve come and how much farther you’re going to go. Keep going for all those people rooting for you and for that little girl with a big dream. (我為你(自己)取得的成就感到自豪，為支持你(我)的人以及那位擁有偉大夢想的女孩而繼續努力!)」