《中聲3》60強聲勢浩大 車婉婉認做主持情緒起落好大

《中年好聲音3》60強PK戰3大賽區混戰，將會喺今個星期日晚，8點半喺翡翠台一觸即發。呢日分別嚟自香港、新馬區及大灣區嘅60強參賽者，齊齊亮相記者會，聲勢浩大。而電視廣播有限公司節目內容營運副總經曾志偉先生以及文化體育及旅遊局文創產業發展處電影製作科總監（電影製作）陳世敏女士都有出席。

《中年好聲音3》60強呢日出席記招。
而大會更宣布歌手布志綸Alan會加盟擔任嘉賓評審，而Alan除咗勉勵一班參賽者要好好享受舞台之外，更被佢哋背後追夢嘅熱血深深打動，Alan話自己年紀唔輕，當從肥媽口中得知參賽者嘅感人故事時，即刻觸動心靈，加上見到一班參賽者竭盡所能應戰，大讚佢哋嘅熱誠。

曾志件亦有現身記招。
入得60強嘅參賽者，位位都各具實力，呢次要1對1決一生死，被視為大熱人馬嘅王鄭俊仁話自己每次都有賽前恐懼症，今次揀咗首港區選手曾經唱過嘅歌曲，知道對方演繹得好好，所以令佢壓力大到失眠。

布志綸將加盟擔任嘉賓評審。
而同樣被睇高一線嘅男大魔王張與辰就好開心得到網民肯定，令佢信心大增，冇諗過咁受觀眾歡迎，而區瑞明透露自己一直落力備戰，特別注重咬字同埋唔好過份作狀。
張佳添、肥媽及周國豐。
同我哋 娛樂新聞台 主播 許文軒 同屆參加新秀歌唱比賽嘅熊力衡，透過《中聲3》相認，仲回憶當年參賽時。任永健就話自己唔敢喺電視上重溫自己演出，覺得好尷尬，通常會等自己心情平伏先睇返比賽再作反醒。另外陳芷盈同陸東成係《中聲2》黃劍文嘅朋友，佢哋都交流咗唔少心得。

車婉婉話主持一啲都唔易做。
除咗一班參賽者心驚膽顫之外，作為主持嘅車婉婉都話呢個身份一啲都唔易做呀，因為情緒起落好大，一時恭喜一時垂淚。